Tuesday, September 22, 2009

يـومــيــات بـنـوتــــة 11

مرسلة بواسطة pakinam ismail في 12:56 AM



يــومــيــات بــنــوتـــة



(11)



بانو بانو بانو على أصلكوا بانو.. بقى كده محدش يسأل عليا فى المستشفى
قصدى يسأل على المقشه فى التوكيل !! أنا حزينة بجد حزينة !!
بس أنا مش هسكت وهرفع قضيه عشان المقشة بعيد عنكوا اتكسرت تكسير على دماغى . أوبس قصدى لوحدها كده مش عارفة إزاى ؟ لو حد عرف سر إنكسارها يقولى ؟!
المهم بقى بعد ما ماما حبيبتى عملت معايا أحلى واجب ودلعتنى أحلى دلع .. عقبالكوا كده يا جماعه .. أنا بقى عقلى شت منى ؟ يا ترى مين ده ؟ طيب شكله ؟ طيب هحبه أنا كمان ولا قلبى هيفضل منحوساً منحوساً يا ولدى !! بس لأ المرة دى لا يمكن أتنازل أبدأً عايزة أكون عروسة يا ناس .. وألبس كده الفستان والطرحة .. هوه يعنى أنا مليش نفس ولا مليش نفس يا ناااااس .. ولا أروح لعمو أوبا ولا بوما ده يشوفلى عريس من البيت الأبيض وليلتنا بيضه إن شاء الله !!
ما علينا .. أنا قررت مفكرش وأسيبها كده مفاجأة خلاص ويا صابت يا خابت بقى !!
وظبطت البيت بقى وخليته بيبرق .. وجريت وجبت من على النت أرقام كل مأذون فيكى يا مصر .. عشان لو داخل قلبى .. نتصل على طووول .. ونفرح بقى .. وخير البر عاجله ولا إيه ؟! ولازم يدفع حق المقشة البريئه إللى راحت عصايتها هدر إهئ إهئ يا عينى عليكى يا مقشتى كان فيكى الخير وياما كنستى السجادة قبل كل ما أشوف عريس !! ومعاكى عرفت مقاس رجل كل عريس !! مكنش يومك يا حبيبتى عاااااااااااااااااااااااه !!
المهم بقى إنى لبست وظبطت الدنيا .. وماما مازالت تنظر لى شذراً .. ولقيتها طلب من البواب مقشة أخرى بدلا من المرحومة !!
المهم فضلت أفكر وأتخيل القعده هتكون إزاى ؟ وأقول إيه ؟ وأعمل إيه ؟ بجد كنت محتاسه قوى وكأنى أول مرة أشوف عريس !! وفجأة رن التليفون وقطع عليا حبل أفكارى !!
ألو .. أيوة صح أنا كوكى .. يا حلولى ده هوه وعرف صوتى لوحده !! لقيته بيقولى سورى يا كوكى أنا حبيت أقولك إننا فى الطريق وجايين خلاص .. يا ترى إفتكرتينى ولا لسه ؟ بصراحه يا جدعان وشى تحول إلى ميكرويف مولع ومبقتش عارفة أرد خالص .. وعايزة أقوله مبلاش السيرة الهباب دى .. وإنك مشيت وأفتكرك ..
يحسن ماما حلفالك !!
فرديت برقه كده وخنفان .. بصراحه لا بس إن شاء الله لما أشوفك أفتكر !!
وقفلت وأنا بتنهد وقلبى بقى بيدق .. بس بيدق كفته غالبا .. وبقيت مش على بعضى يا جماعة خالص مالص .
جريت جرى على ماما قلتلها اللهو الخفى فى الطريق ؟ مين يا كوكى ؟ يوووووه قصدى العريس المجهول . والله مجهول بردوا يا كوكى . . وحياة كوكى يا ماما مجهول ولا أعرفه
ولا أعرف أيها حد . ده أنا مشاركه فى جمعية يا رجاله العالم ربنا ياخدكووووووووو !!
والله يا كوكى ؟ من إمتى يا بنتى ؟ من زمان يا ماما .. يلا عشان تفتخرى ببنتك حبيبتك .
أفتخر ده أنا هفتخر قووى .. ده إنتى نهارك أسود .. يعنى إيه لما ربنا ياخد كل الرجاله مين هياخدك منى يا حلوة .. إيه ده يا ماما للدرجه دى مش طيقانى .. أنا عملت إيه بس طيب أروح فين ؟! خلاص يا ماما هشترك فى جمعية يا رجالة العالم تعالوا زورونا وتعاطفكم لوحد مووو كفايه إتبرع ولو بخطوبة .. طيب قراية فتحه .. ولو حتى خبط على بابنا وإجرى !!
لا يا كوكى مش للدرجة دى يا بنتى .. ما أنا فهمتك بلاش بس الرومانسية والأحلام الوردية وخدى نصحتى كل الرجاله فى الأخر شبه بعض وغير قابله للتجديد !!
وإللى بتشوفية فى الأفلام والمسلسلات تمثيل فى تمثيل !!
مامااااا بجد كفاية حرام .. ياريت تشتركى فى جمعية يا أمهات البنات إرحموناااا !!
بتقولى إيه يا كوكى ؟! مفيش يا ست الكل !! من عنيا أنا فقت خلاص يلا بقى نجهز كل حاجه
عشان مستر إكس جاى !!
وشوية كده وسمعت صوت عربية بتركن .. بصيت من ورا الشباك لقيت عربية جااامده قوى بتركن قدام العمارة .. وواحده ست نزلت .. وعماله تبص على العمارة .. وشكيت إنها حمات المستقبل .. وإستنيت إن الراجل الغامض ينزل .. منزلش .. طيب عشان خاطرى إنزل .. بردوا منزلش !! ولقيت العربية مشيت !! مممممم مش هوه ولا إيه ؟ بس العربية حلوة قوى يا خسارة !
وقفلت الشباك ولقيت جرس الباب بيرن !! إيه ده بقى .. قعدت أنط وأقول بصوت عالى
هيا حماتى .. هيا حماتى . . حماتك مين يا كوكى ؟! لا يا ماما ده أغنيه جديدة نازلة قريبا فى عيد الحموات !! ايه ده هما عملوا عيد حموات يا كوكى ؟! أينعم يا ماما على يدى إن شاء الله !! ورايحه أفتح الباب .. راحت ماما شدتنى .. انتى إتجننتى رايحه تفتحى الباب
إنتى لازم تتأخرى وتتقلى كالعادة .. وأنا كمان هشوف هطلعك ولا لا ؟
نحم نحم ؟! إيه ده بقى ده عريسى يا ماما .. أمال هنجيب بنت الجيران تشوفه !!
وخرجت ماما من غير ما ترد عليااا وأنا مفروسة .. يعنى إيه بعد كل ده مش هشوفه طيب على الأقل أشوف زميل الدراسة .. وأعرف إزاى خانى وجاب كل المجموع ده ودخل هندسة !!
فسمعت ضحك وكلام كده .. ولقيت ماما بتنادى عليا .. يا كوكى .. يالهويز أنا هخرج ولا إيه ؟ يا كسوفى .. رجلى مش مطوعانى خالص .. لقيت ماما بتقولى تعالى دى طنط لوحدها .. وهوه راح يصلى وجاى !! فحطيت إيدى على قلبى وخدت أنفاسى !!
وروحت طلعه .. مساء الخير يا طنط .. لقيتلكوا الست مرة واحده اهلا اهلا عروسة إبنى
يا حلاوة حماتى رضيت عليا بسرعة كده وبقيت عروسة إبنها خلاص !!
طيب زغرطى يا ست الكل .. ولا حد يسمعنا كده زغروطة !!
ولقيتها بتقولى وهيا بتغمزنى كده بقى إنتى مش فاكرة إبنى خالص يا كوكى ؟!
وحياتك يا طنط ما فكراه ولا عرفاه اصلاً !! هتدوينا فى داهيه يا حماتى من أولها كده
ومازالت أمى الغاليه تنظر إلى شذراً !! وما زالت أنا متهمه ومنتظرة أشوف البشمهندس ده مين ؟ مين ؟
وأنا لسه بفكر ولقيتلكوا الباب بيخبط ؟! ولقيت طنط بتقولى إفتحى يا كوكى اكيد البشمهندس جه ؟! ولسه بجرى على الباب .. لقيتلكوا أمين شرطه شدنى كده حته شده زى اللى بشوفها فى الأفلام العربية بتاعتنا كده !!
يا لهويززز قصدى ست الكل شدتنى وبرقتلى كده وقالتلى إدخلى حضرى الجاتوة وإستنى لما أندهلك ؟!
يا سلام ماما دائما الأم المناسبة فى اللحظه المناسبة بجد !!
أروح أنا أكل الجاتوة وأشوف البشمهندس .. ودعواتكم بقى !!

:)))


ضع تعليقك

14 التعليقات:

eman moustafa said...

meeen da ya koky bashmhands ad el donia rbna ysahl

Yomeat Banota said...

:))

hii eman mnwarny zay kol mara

buterfly said...

يا ترى مين المعجب الولهان ده يا ريت تقوليلى بسرعة عشان انا متشوقة اعرف بقيت الحكاية
وعلى فكرة انا اول مرة اقرا المدونةو عجبنى اسلوبك جداو مبروك على الكتاب

Yomeat Banota said...

اهلا بيكى اولا انا سعيده انك اول مرة تقريها بس عجبتك الحمد لله :)

ده سر كبير هتعرفيخ ان شاء الله قريب

وياريت تشاركينى جروب يوميات بنتوة للبنات فقط بالفيس بوك

:)

والله يبارك فيكى يا قمر ونورتينى

εïз Semsema εïз said...

هههههههه حلوة أوي يومياتك يا كوكي :D

أول مرة اجي هنا

مستنية بقية الحكاية بئا :D

Anonymous said...

المدونة جميلة جدااااااا
وياريت تكملى الحكاية بسرعة علشان انا متشوقة اعرف بقيتها

zoka said...

انا هتجنن واعرف مييييييييييييييييين
كمان انا فى مشكلة هو لو مامة العريس عارفه ان العريس كان يعرف العروسة هتفضل تزل انفسها كده

Yomeat Banota said...

اهلا بيكى سمسمة اسعدنى وجودك لاول مرة

واتمنى متكنش اخر مرة وتعجبك دايماً

وتكونى ت ا ب ع تى كل اليوميات من اولها وقريب ان شاء الله هكملها

:)

Yomeat Banota said...

Anonymous said...

كان نفسى اتعرف باسمك

بس مرسى لوجودك وكلامك الجميل ليا

وقريبا هكملها ان شاء الله

:)

Yomeat Banota said...

زوكا منورانى كالعاده يا جميله مرسى ليكى

هههههه على حسب يا زوكا فى حماوات

متفهمات وفى حماوات ربنا يرحمك لو عرفوا حاجه :))

فعلى راى المقوله الشهيرة حرص ولا تخونش

بس مش تنسى تعزمينى :)

Tadwina said...

مرحبا / بنوته
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1803

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com.
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

mona said...

ربنا يجعله خير يا حبوبه وتفرحى ماما ان شاء الله

بـاكـيـنـام إسـمـاعـيـل said...

م منى واهلا بيكى شرفتى مدونتى ودعواتك الجميله يارب دائما

:)

تحياتى باكينام اسماعيل

احلام على ورق said...

ههههههههههه
بجد اسلوبك جميل جدا
وطريقه عرضك حلوة ولذيذة اوى
متابعه معاكى

 

يــومــيــات بـــنــوتـــة Template by Ipietoon Blogger Template | Gadget Review