يــومــيـات بـنـوتـة 12 ؟

يــومــيـات بـنـوتـة 12 ؟

رجعتلكوا بعد ما أكلت الجاتوة كله .. أه كله أصل سمعت فى نشرة الخمسة وعشرين ساعة أن الجاتوة هوه سبب الرشاقة .. وبما أن الجاتوة لا يظهر إلا بالمناسبات السعيدة بنصح كل البنات أنها توافق تشوف كل عريس حتى لو عندها أى أعتراض عليه .. المهم أنها تفوز بالجاتوة
وعلى رأى المثل الراجل مش بس بكلمته الراجل بجاتوه لعروسته ولأسرته !!
أنا عملت اللى عليا ونصحتكوا يا بنات وكل واحده وشاطرتها يجلها كام دسته كده وخصوصا ً
لو بالشيكولا تبقى بنوتة شاطرة أخر حاجه !! بس أبقو سبولى حته بما انى مش محتاجه دايت !!

المهم بقى نرجع للبشمهندس .. أنا دخلت المطبخ أجهز الجاتوة .. ولقيت طنط بتنادى عليا طنط بتنادى هيا وماما عليا وبيقولولى لا مطلعش البشمهندس ؟! ايه ده هوه زوغ ولا ايه من أولها؟!
ولقيت طنط بتقولى تعالى يا كوكى جانبى يا حبيبتى عايزة أتكلم معاكى قبل ما البشمهندس يجى ؟
ااااه قلت خير اللهم اجعله خير .. وبكل نعومة ورقه بقى حاضر يا طنط أتفضلى ؟!
كوكى هيا الدباديب دى كلها بتاعتك والعرايس ؟! الصراحه السؤال صعب قوى يا أستاذ قرداحى؟
اه يا طنط دولا بتوعى من أيام الطفولة المتشرده .. قصدى الطفولة البريئه !!
طيب ويا كوكى أنتى بتخرجى مع صحباتك وبتشوفيهم وكده ؟! رديت بكل تلقائيه أه يا طنط يعنى حسب الظروف بنتجمع مع بعض زى أى أصدقاء !! ممممم طيب وأشتغلتى قبل كده يا كوكى ؟!
أه يا طنط أشتغلت قبل كده .. بس حالياً خارج نطاق الخدمة وببحث عن شغل ؟! قلبى يا جماعة أنقبض هوه أنا فى كشف هيئه وداخله الجيش ولا أيه ؟! ولا ده اللى بيسموه فيش وتقفيش ؟!
لقيت طنط وشها اتقلب وجاب ألوانات الطيف كلهااااا .. قلتلها خير يا طنط فى حاجه ؟!
قالتى اصل بصراحه البشمهندس بقاله فترة متغير كده .. وتعبنى ويااااه يا كوكى وأنتى ما شاء الله عليكى شكلك مبتسمه وروحك حلوة .. يا حلولى أيوة هيا دايما البداية كده وبعديها الصدمات تأتى !!

ليه يا طنط هوه البشمهندس ماله ؟! قالتلى أبد معرفش بقى ليه أفكار متشدده قوى فى كل شئ
يعنى الدباديب اللى كانت فى البيت عندنا خدها كلها ورماهااا لأنه أعتبرها أصنام !! وأنا شغلى كل شوية يقولى سبيه واللى انتى لبساه ده حرام !! حتى خلانى أسحب فلوسى كلها من البنك يا كوكى .. ومفيش خروجات ولا بيرفه عن نفسه كده وحياته كلها شغل وبس ؟!
يا لهويزززززز عليك ايه يا بشمهندس من الجماعه إياهم ولا إيه ؟! طيب أنا عايز منى إيه ؟!
ده أنا من حزب كـفــــــايــــــــة !!

هوه أنتى يا كوكى فقر كده دايما يا بتقعى فى واحد يقلك عمرو وحماقى .. يا واحد هيحرم كل شئ
مفيش وسط يا ناااااس ؟! هوه يوم ميلادى المنحوث ده لازم يكون قدرى كده ؟!
ماما بقى نزل عليها الكلام كالصاعقة .. وأنا قعدت مرعوبة .. إذا كان بيعمل كده مع مامته إللى راحت عليها الحياة خلاص .. هيعمل فيا أنا إيه وأنا لسه بنوتة .. وبقول يا هادى .. هينفينى فى جزيرة الواك الواك ؟! ولقيت طنط بتقلى بس يا كوكى يمكن معاكى أنتى يكون أفضل طالما بيحبك .. وأختارك وأنتى شكلك عاقله وتقنعيه وتتفاهمى معاه ؟! بس أوعى تقولوا إنى أتكلمت فى حاجه ؟! بلعت ريقى وقلتلها لا يا طنط حضرتك عايزة تحصل معركه هنا ولا إيه ؟! ولقينا الباب بيخبط .. وأنا جريت جرى .. وأتسدت نفسى عن الجاتوة وعنه وعن الحياة كلها .. ولقيت ماما جايه ورايا وعماله تضحكك عليا وفرحانه فيا طبعا .. حتى أنتى يا أماااااااه .. المهم أن برائتى ظهرت ومش هتبصلى شذرا مرة تانية !! وقالتلى أطلعى شوفى البشمهندس وأعيدى ذكريات ثانوى .. أأأأأأأه ده أنا هكون بقى تريقه العيله كلها .. ده أنا كرهت ثانوى على الدروس كلها !!

وبقت رجلى يا جماعه تقدم خطوة وترجع عشر خطوات .. مش قادرة أطلع ولا عايزة أطلع اقول إيه بقى بعد الأحباطات دى كلها ؟! وبصيت من ورا الباب كده وشفته ؟! بس مش فكراه .. وبعد اللى سمعته مبقتش عايزة أفتكر كمان .. فضلوا طبعا ينادوا عليا .. والخروج بقى إجبارى وجاءت لحظه الصفر .. وخرجت وأنا عينى فى الأرض .. وقلت السلام عليكم .. وقعدت .. لقيته وقف وابتسم ومامته قالت البشمهندس مش بيسلم !! قلتلها ولا أنا كمان بسلم أصلا يا طنط !! ومبقتش قادرة أبصله خالص .. وقلبى فضل مقبوضاً مقبوضاً يا ولدى !!

لقيته بيقولى لسه بردوا مش فكرانى يا كوكى ؟! طلعت الأبتسامة بالعافية وقلتله بصراحه مش فاكرة ؟! قالى خالص ولا فاكرة أى موقف ؟! ولا أنى كنت بمشى وراكى بعد كل درس وقبل كده أتخانقت عشانك ؟! راحت مامته قالتله ما انت طلعت نمس هو يا بشمهندس هههههههه
قالها كان زمان بقى ؟! بينى وبينكم شردت كده شوية والذاكرة رجعتلى وأفتكرت أن فى ولد فى الدرس معانا جه قالى أنه عايز يرتبط بيا .. وبردوا سمع نفس الجواب المعتاد أسفه مش برتبط بحد ومستقبلى أهم .. مكنتش عارفه أن المستقبل هيكون أخرته يوميات ما يعلم بيها إلا ربنا كده !! كنتى فين يا أأأأأأه لما أنا كنت بقول لاااااااا !! والمهم أن البشمهندس شافه وراح أتخانق معاه .. معرفش على أنهى أساس .. بس المهم إنى أنا والبنات شفنا فيلم هندى أكشن لايف ومجاناً كمان !!

كوكى .. ايوة ايوة .. بصراحه مش فاكرة قوى يعنى ممكن اكون افتكرت ان شكلك مش غريب عليا وأنك كنت معايا بالدرس .. وبقيت فى سرى أقول يعنى عايزنى أقول ايه ده إيه الأحراج ده ?!

راحت الحاجه ام كوكى .. إللى هوه أنا .. فتحت فةى الكلام مع البشمهندس .. عن شخصيته ولقيته بيقول نفس كلام مامته .. وكانت المأساة فضلوا يجادلوا وأنا قعده أتفرج .. وحسيت أنى فى مناظرة .. ولا فى برنامج عما يتساءلون .. وكل واحد بيقول رأيه !! وراحت ماما قلتله بصراحه كوكى ليها صديقات كتير وكلهم متربيين مع بعض .. وأشتغلت .. وبتحب الدباديب والخروج طالما كله فى حدود الأحترام .
وفجأة سألنى أنتى إيه رأيك يا كوكى ؟! طبعا أختكوا أتفأجات .. وأرتعشت .. بس قلت لا يا كوكى ردى عليه بكل عقل ومنطق ؟! قلتله بصراحه أنا مش فاهمه العرايس والدباديب دى مجرد ألعاب كنا بنلعب بيها زمان .. وهخليها لأولادى كمان يلعبوا بيها .. مفيهاش أى شئ .. حتى شغل المرأه طالما بحدود وشغل حلال .. فيها إيه ؟ حتى البنوك مش كلها حرام ؟! الحياة مش سوده قوى كده يا بشمهندس !! راح ساكت .. هوه معرفش يرد علينا بصراحه تلاته على واحد كان صعب بس هوه إاللى جابه لنفسه .. لو متأكد من كلامه كان قدر يقنعنا ولو قاعد مع عشرة !! فلقيته بيقلى بس أنا عايز أنقيك وتقعدى بالبيت .. وأنا مش محتاج شغلك ؟!

يا حلولى ده على اساس إنى وافقت ؟ وعلى أساس أن الشغل عشان الفلوس بس ؟ وعلى أساس النقاب فرض ؟ كل ده طلبته منى فى قعده واحده ؟ من غير ما تعرف أنا أرتحت ليك أصلا ولا لا
أيه البشمهندس بيهندس عليا مرة واحده ؟!لا أروح أجبلهم الجاتوة أفضل !!
وفضلوا يتكلموا .. وأنا عقلى هينفجر ؟! هوه أنا الغلط ولا هوه ؟ حد يقولى يا ناس ؟!
وفضلت القاعده كلها كلام عادى .. وأكلوا الجاتوة ومشيوا .. ومامته بقت مبسوطه قوى منى وعجبها كلامى .. ووشوشتنى وقالتلى كوكى هكلمك بكرة ؟!

وقفلت الباب وأنتا باخد أنفاسى بالعافية وماما جلها كريزة ضحك .. وطبعا أستلمتنى .. وقالتلى خسارة المقشه اللى كسرتها عليكى .. ومبرووووك يا كوكى .. هتعتزلى كل الحياة من أجل البشمهندس !! مبروك يا حبيبتى ؟! صبرتى ونولتى .. وحتى الحياة الرومانسيه إاللى وجعلنا بيها دماغنا كل شويه بكتباتك وكلامك .. هيعيشك أحلى منه .. لااااااا مبرووك ايه أنا مش موافقه نهائى .. قالتلى بس أنا موافقه بقى يا نور عين ماما !!

ماشى يا ماما وافقى وانا هعمل مظاهرة فى كل حته فيكى يا مصر.. وأخلى الناس ترفع موبيلاتهم وتنوره وبأعلى صوت يقولوا .. أأأه .. أأأه .. جواز كوكى من البشمهندس بااااطل .. بااااطل .. ومسكت موبايلى وبدأت المظاهرة من بيتى وقعدت أصرخ بااااااطل .. بااااااطل لغايه ما عينى وقعت على العلبه إاللى جابها معاه البشمهندس .. قلت هفتحها لو حاجه بحبها ممكن أفكر وأحاول معاه .. لو العكس يبقى من كله كمان .. لقيت ماما بتقولى بلاش يا كوكى ابعدى عن العلبه أحسن .. روحت مستخبيه ورا الكرسى .. خير يا ماما هيا قنبله ولا إيه
قالتلى أكتر يا كوكى .. يالهوزز..هوه فى أكتر من القنبله .. ماما بتلعب بأعصابى لسه بس هفتحها هفتحها ولو قنبله يبقى أحسن وأكون شهيده .. وأرتاح من العالم ده .. وغمضت عينى وبفتح .. تخيلوا بالنسبالى طلعت افظع من القنبله !! لقيتها تورته بالكريمة وغرقانه فى جوز الهند كمان !! يا ويلتى .. كلها كريمه مفيهاش حته شيكولاااااااا وبجوز هند أللى أنا عمله مقطعه معاه .. ماشى يا هند لسه مش عارفه تبعدى جوزك عن الحلويات !!

يعنى حتى فى دى مش متفقيين ؟! ولا يمكن دى الحاجه الوحيده البيضه فى حياته ؟!
بقلكوا إيه هتخلص من القنبله الموقوته دى وأرجعلكوااااا .. يووووة التورتايه الكريمايه دى ورجعلكوا
أوعوا تروحوا فى أى حته
:()