Saturday, December 12, 2009

يـومـيـات بـنـوتــة 13 ؟

مرسلة بواسطة pakinam ismail في 1:57 PM




حد عايز قلب فاضى .. قلب طيب قلب هادى .. مستعد يحب حتى قلب عايز ينسى ماضى
حد .. حد .. حد .. طيب سبت .. جمعة .. خميس .. كل الناس قلوبها مشغولة ولا إيه ؟ أمال بيقولوا نسبة الجواز قلت ليه بقى ؟ بلد بتاعه إشاعات صحيح !!

نرجع للمفيد بعد ما تخلصت من القنبله إياها .. لااااااااا قصدى التورتايه أنا بريئه من قنبله الحسين خالص مالص .. ده أنا أصلا بشجع السياحة .. وخصوصا السياحة التركية وأنتوا عارفين ليه طبعا .. وبتمنى يحصل تبادل أزواج .. وتبادل رومانسيات .. يوووة لسانى ده هيودينى فى داهيه .. قصدى طبعا تبادل ثقافات وحضارات .. الخ ..
المهم ملناش دعوة بالسياسه خلينا نخلص اليوميات على خير . التورته طبعا اتوزعت على الجيران والأسرة الكريمة وأنا يادوب .. تذوقتها من بعيد لبعيد ..ونفسى قفلت من العريس زى التورتة بالظبط !!

وست الكل طبعا مسكتلى المقلب ده وفضلت تقول حسرة عليها يا حسرة عليها وتضحك قوى .. وبقيت مكسوفه قوى من حالى ما أنا إاللى بنيت أحلام وقلت أخيراً فارس الأحلام وصل بعد طول أنتظار .. بس خسارة الحلو ميكملشى .. إهئ إهئ خلاص أنا أكتئبت يا عالم !!

ولسه بكمل المسلسل الدرامى إاللى أنا فيه ولقيت التليفون بيرن .. بينى وبينكم أنا أتعقدت من كل التليفونات كلها .. وهقطع الحرارة كمان عشان محدش لا يجبلى مقلب .. قصدى عريس ولا غيره .. ومحلها حياة العزوبية .
وسبته يرن وعملت نفسى ولا هنا .. ولقيت ماما بتنادينى كوكى .. طنط أم المهندس على التليفون !! يووووه كده يا ماما بقى أنا ما صدقت أن اليله عدت هتكلم تانى فى إيه بس ؟!

ألو أه أهلا يا طنط إزاى حضرتك ؟ ولقيت طنط بتكلم بصوت فرحان قوى ؟ قلت خير هيا ماما قالتلها إننا وافقنا وعملت فيا مقلب ولا إيه ؟! ولقيتها بتقولى البشمهندس كان عايز يتكلم معاكى يا قمر أنتى ؟! يا حلولى والله الست دى سكرة وكلمها كله سكر بس لو إبنها كان زيها كده .. وقالتلى كفايه أن أنا نفس برجكك ده النهاردة عيد ميلادى ؟
قلتلها سنة حلوة يا طنط !!

والصراحه مبقتش عارفه أرد عليها وقلت فى عقلى هوه الأم تكون لطيفه وحبوبة كده الأبن يطلع مختلف والعكس ده إيه الحظ ده يا كوكى .. وقلتلها حاضر يا طنط ممكن نتكلم ؟!
ولقيت البشمهندس بعد السلامات والتحيات بيقلى كوكى أنا حسيتك خوفتى منى إمبارح وأتصدمتى لما شوفتينى ؟! يا كسوفى قد كده بان عليا .. وكل شئ إنكشف وبان !!

قلتله لا طبعا بس أنا أستغربت كتير من أفكارك وإنك حتى مش إدتنى أى فرصة نتكلم ونتناقشش .. والصراحه مش من أول مرة تطلب كل طلباتك حتى لو كانت الصح من غير ما تسمعنى ومن غير حوار أو تفاهم وكله مرة واحده !! ولا إيه يا بشمهندس ؟!

سكت كده وساد صمت غريب وقالى أنا كنت فاكر صحابك بلغوكى شخصيتى ؟ قلتله لا وهيعرفوها منين ؟ بعدين الحياة مش كده مش كل شئ ممنوع كل شئ متاح وبحدود ؟!
وأنا ممكن أعمل كل شئ تطلبه بس على الأقل لما نتعرف أكتر ويحصل توافق بينا ؟!
لأن أنا مش بشوف الموضوع إنه عريس وبيشتعغل وعنده شقه وعربيه وانتهينا ؟! الجواز فيه حاجات كتير أكبر وأهم من كده ؟ ولا إيه يا بشمهندس ؟! وصحيح اليوم عيد ميلاد مامتك يا ترى جبتلها هدية ؟ أو هتخرجها أو عملت أى شئ يسعدها ؟!

البشمهندس أختفى ولا إيه مسمعتش أى نفس ليه ؟ قالى إن شاء الله طبعا !!
قلتله نقطه كمان فى بنات كتير بتلبس اللى العريس بيطلبه وتسيب شغلها وكل شئ بتحبه عشان الجوازة تتم ومع أول خلاف بينهم بتعمل العكس لأنها عملته عشانه فقط نمش على إقتناع بيه ؟ راح قايلى أه معاكى حق ده أنا صاحبى خطب بنت ولبسها الأسدال ولما فسخوا الخطبه قلعت الأسدال !! يا حلولى ايوة كده يا بشمهندس أديك قربت تفهم وجهه نظرى
قلته شفت أنا بقى مش هعمل كده ويوم ما هعمله هيكون عشان ربنا ونفسى والشخص المرتبطه فيه !! سكت بردوا .. حساه عارف الصح بس عقله متلغبط أو حد مأثر عليه !!

وأنا بنوتة أكتر شئ بحبه النقاش ويا تقنعنى يا أقنعك والمعنويات أهم عندى من الماديات
المهم جله تليفون على موبيله واضطر يقفل معايا وقفلت وأنا عقلى هيشت منى ؟! لي فى شباب بتفكر كده مع إنهم بيقولوا اهو بلسانهم الواقع بس بيعملوا بردوا عكسه !!

وقفلت وقلت لاااااااااا إستحاله هوافق ده عيد ميلاد مامته ومهتمش بيها .. هيهتم بيا أناااااا
وكل شئ مش مقتنع بيه .. لااااااا هيا ناقصه والله ما ناقصه .. وأكيد هلاقى أسد الغاب طويل الناب !! ولقيت ماما بتضحك وتقولى نقول مبروووووك .. لااااا يا مامتى يا حبيبتى هوه أنا أقدر أسيبك بالسهولة دى .. لسه هونسك كمان وكمان .. راحت قيلالى بس أنا شبعت منك قوى يا كوكى .. وأتونسنا كتير قوى وكفايه لحد كده ؟ يالهويززز علي رجعنا لنفس الأسطوانه تانى .. والتليفون رن تانى .. قلت ربنا يستر معنديش نفس للجدال خالص مالص . وبرد لقيت أم البشمهندس .. وصوتها قلب نبرة حزن وقالتلى كوكى أنتى رفضتى البشمهندس ولا إيه ؟! عايزة أقولكوا بجد أتمنيت أن الأرض تنشق فعلا وتبلعنى ده سؤال أصعب من أسئله الثانوية العميه .. قصدى العامة .. مع أن معناها الاصلى الأولانى من رأيى !! ما علينا قلت مليون مرة محدش يوقعنى فى الغلط !! قلتلها ليه حضرتك بتقولى كده .. قالتلى أصل البشمهندس عصب وقالى الموضوع إنتهى وأتهمنى إنى أنا السبب وخوفتكوا وخد بعضه ونزل!!

اااااااه ده أنا وقعت فى فيلم هندى ولا إيه ؟ ناااااااهى يا طنط !! أوبس لا يا طنط إحنا إتناقشنا بس بردوا نفس أسلوبة يا طنط !! فأسفه مفيش نصيب وحضرتك ملكيش ذنب !!
الست يا عينى إحرجت وقالتلى طيب تاخدى محاوله كمان معاه ؟ طيب أقولها إيه ؟ أنا معنديش أى قبووووووول وكفايه التورتة بقى إاللى ما اتهنتش حتى بيها وكتمه فى قلبى وساكته من الصبح !! وانتهت المكالمه وأناا بأمانه أم البشمهندس صعبانه عليا . وكان على عينى بس أنا كتاكيت مش ناقصة . وماما لقيتها بتسألنى حصل ايه كوكى ؟!

ولقتنى قلبت على عبد الفتاح القصرى .. ومبقاش على لسانى غير كتاكيت .. كتاكيت .. كوكى مالك يا بنتى ؟ كتاكيت يا مامااااا مش عايزة أتجوززززززز يا ماماااااااا .. ومن النهاردة هرفع خط التليفون .. وممنوع أستقبال أى مكالمة .. وتليفونا هيكون محروقاً أو مشنوقاً طوول الوقت !!

كوكى حبيبتى أنتى سخنتى .. البشمهندس جننك كده .. لاااا يا ماما هوه البشمهندس بس ده أنا قابلت كل الوظايف وبردوا مفيش فايدة .. أنا هتجوز واحد عاطل يا مامااااااااااا
وهوبا وراح التليفون رن .. ماماااااااا مترديش أرجوكى .. يا عينى عليكى يا كوكى .. ده موبيلك يا بنتى .. موبيلى أأأه صحيح .. موبيلى مننا وعلينا وحبيب قلبى .. لكن تليفون البيت ده حسه وزير الأتصالات مسلطه عليا ومش بيحولنا إالا المكالمات إللى بتحسر قلبى !!

ورديت لقيت البت دودى صحبتى .. كوكى إيه الأخبار ؟! نقوول مبروك بقى ونعتمد عليكى توصى البشمهندس يساعدنا ويجبلنا شققق نتجوز فيها ؟؟؟؟؟ أأأأأخ يا نفوخى حتى صحابى عايزين مصلحتهم على حسابى ؟ بقى ده إللى همك ؟! لا يا دودو البشمهندس راح .. خد ماسترته وراح .. خد منقلته ورااااح .. خد قلمة ورااااااااح .. راااااااااح .. أهئ .. إهئ
متزعليش يا بنت يا كوكى .. بعدين ملحوقه مش هنروح كتب كتاب البت ميرو الخميس الجاى .. فيلا إستعدى وعندك فرصه كبيرة هتلاقى فيها ولاد حلال كتيررر !!

يا حلولى أيون كده هيا دى المكالمات إللى تفتح نفس الواحد إنه يرد على التليفوناتقلتلها أكيد هرووووووح .. وأكيد هلاقى فارس الأحلام ونكتبو إحنا كمان الكتاب .. وايوووة
وقفلت وأنا إيه أخر إنشكاح .. وماما لقيتها بتضرب كف على كف !! كوكى أنتى بشعره يا بنتى؟! أيون يا ماما أنا بشعرة ساعة تروح وساعة تيجى !!

ماماااا من النهاردة مفيش إستقبال أى مكالمه من التليفون المنحوس ده .. وقال إيه يضحكوا علي البنات ومخلينهم قاعدين جنب التليفون ويعشموهم ويقولولهم طول اليوم بعد المسلسل وقبل المسلسل .. أتكلم أرضى يا أبن بلدى .. صوتك بقى واضح قوى عندى !!
طيب هوه فين أبن بلدى ده ؟َ! مبيتكلمش ليه لا بصوت واضح ولا صوت مبحوح حتى لاااا خلينا فى الموبيلات إاللى بقت تتضاعف الرصيد .. يمكن يجلنا مسج .. ولا مسد كول حتى

أوعى حد يرد على التليفون هشحن موبيلى ورجعلكوا

:)))


ضع تعليقك

19 التعليقات:

zoka said...

طيب انا نفسى اعمل زيك كده بس افهم بقى اهلى هيخنقوا عليا ولا ايه دا الموضو وصل لدبل وحركات غلسه

pakinam ismail said...

اهلا زوكا منورة المدونة كالعاده :)


طيب ليه مضيقه ان الموضوع وصل لدبل

خلينا نفرح يلا :)

بس طبعا لو مش مقتنعه ومش مرتاحه

ومعندكيش اى قبول ارفضى وصممى وخدى موقف بكل هدوء من غير ما تخافى لان دى حياتى وبلحظه ممكن تندمى بعدين

ولو حصل وخنقوا عليكى كلمينى بس :)

buterfly said...

الله عليكى يا كوكى دايما منورة المدونة باسلوبك الرائع بس انا نفسى تنازليها كتاب عشان اقرأها مرة واحدة

pakinam ismail said...

مرسى يا جميله لكلامك الجميل

ان شاء الله الكتاب هينزل بمعرض الكتاب الجاى بشهر واحد اتمنا يعجبك

:)

zoka said...

هاى ازيك
المشكلة انى بواجهه وبفهمه وهو راضى انى انضبت واتبهدلت يقولى انتى ترضينى انا وتمشى امورك معايا اهلك مش هيزعلوكى كانه دخل فالشق اللى ما بينا والازمه اللى مدايقانى انه عرف انى اتبهدلت وعمل يقولى هو انا زليتك لما عرفت ياسلام طيب لما ابقى فبيته انا اعرف منين وعايشلى فدور الغامض بقى انتى اللى تتكلمى اقعد ارغى افتح مواضيع وفالاخر يقولى كملى كانى بقى شهرزاد ولا ايه بس ولما ازهق ويجيلى هبوط لانه بقعد كتير جدا من الساعه 4 العصر للساعه واحد ونص باليل بتعب من كتر الكلام وبعدين لنما اقول تعبت يقول ليا اهلى ده بيحبك ده بيحب يسمعك وعايزين يجوزهولى شهر 7 طيب انا لسه فسنه تالته كلية ازاى اتجوز وانا مش طايقه ولما تعبت وسكت ولا بقت ارد على حد عجبه الموضوع بيقولى خليكى مسالمه كده حلو قوى انا مش هنكر ان الميزه الوحيه اللى شايفاها فيه انه بيصلى المشكلة كمان انى اهلى مستقلين بشكلى بصى انا معنديش ماتع ابعتلك صورتى بس بجد عمر ما حد بهدلنى كده كنت تخينة و قلو احمدى ربنا انه رضى بيكى ولما خسيت قالو انتى شكل اليهود كده وبقيتى وحشه طيب بجد تعبت وهن بيسغل الموقف ده بيكدبونى وبيصدقوه ويقولى ايه انا مطلوب وفى 4 بنات كانوا عايزنى اخطبهم ولما بتعصب من كلامه واقوله انه كلام رخم وسخيف يقولى انتى بتغيرى وبتزعلى طيب خلاص هاخد بالى ومش هقوله تانى انا بجد تعبت

Anonymous said...

زوكا كل كلامك ده صعب جدا

ونصحتى ليكى بجد اياكى ترتبطى بانسان

مش بتحبيه لا بعقلك ولا بقلبك ومش متفهمين بالطريقه دى انتى لسا صغيره ولسا قدامك الحياة واذا كنتى كده على البر وده كلامك واحساسك تجاهه ازاى هتتجوزيه ؟ ازاى هتبنوا اسرة جميله سعيده لازم تصلى استخارة كتير وتفكرى بعقلك صح بالموضوع وبالشخص بعيدا عن اى ضغوط من اى حد

واحنا بزمن اكيد اهلك مش هيجوزوكى بالغصب لازم تتكلمى معاهم بصراحه ومعاه هو كمان وتعرفيه انك مش عتقدرى تسعديه بس المهم تكونى فعلا فكرتى صح ومش ظلماه ومش مدياله اى فرصه واتمنالك التوفيق يارب

باكينام اسماعيل

zoka said...

شكرا لردك لانى برده ممنوعه من الكلام وكده بس اهتميتى ورديتى شكرا جدا

Anonymous said...

زوكا ليه ممنوعه من الكلام يا جميله ؟

اتمنى تكونى بخير واتمنى تضفينى على الفيس بوك لو تحبى على

yomeatbanota2009 @hotmail.com

ومفيش اى شكر يا زوكا انا معملتش اى شئ

اتمنى كلامى يكون افادك ولو بأى شئ

واتمنى اسمع عنك كل خير

Anonymous said...

باكينام اسماعيل

أحمد شفيق said...

باكينام انتى رحتى فين على اليس بوك والاكونت بيتاع يوميات بنوته راح فييييييين ؟؟ ايه اللى حصل ؟؟؟

Anonymous said...

:)

Aliaa said...

amaaaaaaaaaaaazing :))

pakinam ismail said...

merci ailla :)

koki roni said...

السلام عليكم انتى فعلا احلى واجدع بنوتة تتكلم بلسان حال الاغلبية بجد انتى تحفة وسكرة اوى ياريت تقبلينى صديقة ميرسى

Anonymous said...

بجد تسلم ايدك يااااااااااااكوكى رووووووووووووووووعه والله العظيم انا حسه انتى اناااااا سكر بجد وطريقة كتابتكوتعليقاتك وكل حاجه بجد هبقى مبسوووووووطه لو بقيت صديقه ليكى

Anonymous said...

ما أروعك باكينام مدونة رائعة فأنتي مثال للكلمة الطيبة فأنا سعيد بقراءتي لمدونتك ووفقك الله دائما لما يحبه ويرضاه ورمضان كريم وكل عام وأنتي بألف خير وبصحة وسعادة

الشاعر محمد محي said...

ما أروعك باكينام مدونة رائعة فأنتي مثال للكلمة الطيبة فأنا سعيد بقراءتي لمدونتك ووفقك الله دائما لما يحبه ويرضاه ورمضان كريم وكل عام وأنتي بألف خير وبصحة وسعادة

Anonymous said...

ما أروعك باكينام مدونة رائعة فأنتي مثال للكلمة الطيبة فأنا سعيد بقراءتي لمدونتك ووفقك الله دائما لما يحبه ويرضاه ورمضان كريم وكل عام وأنتي بألف خير وبصحة وسعادة

pakinam ismail said...

تحياتى للجميع وعيد سعيد عليكم وشكرا ليكم على تعليقاتكم الجميله واتمنى مشاركتم على صفحتى بالفيس بوك

http://www.facebook.com/pages/%D8%A8%D8%A7%D9%83%D9%8A%D9%86%D9%80%D9%80%D8%A7%D9%85-%D8%A5%D8%B3%D9%85%D8%A7%D8%B9%D9%8A%D9%84/210357672357741

 

يــومــيــات بـــنــوتـــة Template by Ipietoon Blogger Template | Gadget Review