Tuesday, May 1, 2012

يــومــيــات بنـــوتـــة ثائـــرة

مرسلة بواسطة Yomeat Banota في 7:01 PM




( إحنــــــــــــــا أسفيــــــــــــــــن يــــــــــــــا عـريــــــــس )



إزاي ترضيلي حبيبتي أتمعشق إسمك وانتى عماله تزيدي في حيرتي
وما انتيش حاسه بطيبتى إزاي مش لاقي في حبك دافع ولا صدق في عشقك شافع إزاي أنا رافع راسك وانتي بتحني في راسي إزاي! 

إهئ إهئ أه إزاى .. إزاى .. بس هقول ايه الثورة مستمرة رغم أنف الفلول والكنبة والعسكر وإيــــــــــــــــــــــــــــــــــــــه :) ! 

معلش غبت عنكوا الفترة إللى فاتت ما انتوا عارفين إحنا فى ثورة فمفيش وقت للحب ولا للخطوبة ولا للجواز .. القلب بعيد عنكم معتصم والشباب ثائر وطبعاً كانت أحسن حجه كل ما حد يقول هـــا مش هنقول مبروك قريب ولا مش هنفرح بيكى قريب .. الرد كان على طول كان على عينى بس إحنا فى ثورة والعرسان يا استشهدوا يا اتصابوا يا معتصمين يا ثائرين ;)



بس بينى وبينكم الواحد كان نفسه يحب ولا يتخطب ويتجوز ويخلى الشعب يعمله أحلى زفه مصريه فى ميدان التحرير وأتصور أنا والمحروس جنب الدبابه كده
علشان نبقى نحكى لأولادنا ان أنا والدبابه وأبوهم فى صورة واحده :)

ندخل بقى على المفيد .. المهم إن الثورة قامت والحمد لله وأنا كنت ثورجيه على قدى كده ونزلت كام مرة التحرير من أجل اسقاط النظام وفضلت عايشه على الفيس والواقع فى مسلسل الثورة المصرية 

وعلى ال mbc4 المسلسلات التركية المغرضه .. العميله لسه شغاله منهم لله هما بيحبوافى بعض .. وبيتجوزوا بعض واحنا مقضينها أخبار وحوادث ومواقع واعتصامات وخراطيش وقنابل غاز على قنابل مسيله للدموع يعنى من الآخر عايشين مسلسل رعـــــب !

بس إحنا هنحب وهنتجوز يعنى هنحب ونتجوز .. أه بالذوق بالعافيه هنتجوز .. ده إحنا ممكن نعمل ثورة شعارها شبكه .. كتب كتاب .. جوازه هنيه :)

قبل ما الواحد يقضى حياته كلها بيتابع كل أحداث البلد ويشوف حال البلد اللى يشيب ويشيب قبل الآوان . ولا يفضل يسمع كلمتين من المجلس المنزلى زى هتنورينا كده كتير .. وامتى افرح بيكى وأشوف عيالك .. وخليكى كده موكوسه مش عروسه ............الخ الخ من الكلمات الجميله اللى بترفع معنويات الواحد وتخليه يقول جااااااااااااااااااااااى :)

نيجى بقه للمهم وأنا قعده بتفرج على التلفزيون وعماله أعيط .. أعيط على حالنا وحال البلد وحاسه خلاص إنى أكتئبت وعايشه حاله أنا مش عارفنى وأنا مش أنا .. لقيت تليفون البيت بيرن .. مسكت السماعه وبصوت مبحوح رديت وقلت ألو .. 

مساء الخير.. مساء النور مين ؟ أنا طنط شريفه ! كوكى معايا ولا مامتها ؟

لا انا كوكى يا طنط ! اهلا اهلا يا كوكى انا طنط شريفه احنا صحيح منعرفش بعض قبل كده بس شكلنا هنعرف بعض على طول ان شاء الله !

أنا طبعا الكوبليه ده سمعته كتير كتير كتير لما حفظته وفى الآخر لا بنعرف بعض ولا بنطيق بعض وممكن نضرب بعض كمان ! 

ومن غير ما أسألها حضرتك مين وعايزة ايه أنا فهمت طبعاً هى مين وهتقول ايه ! وكالعادة مش هقول غير ربنا يستر !

وطبعا ست الكل اخدت السماعه وهاتك يا ضحك مع طنط شريفة وانتهت المكالمه انى هشوف كده ظروفى وارد على حضرتك ان شاء الله ! 

وماما قفلت من هنا وبصتلى وقالت دى ماما عريس ومن غير ما تقوليلى كالعادة ايه بياناته .. أنا معرفش أى حاجه وكل حاجه طنط قالتلى تعرفيها لما نتقابل سوى سوى ! 

وأنا طبعا مكنش عندى رد غير يا حالولى يا ست ماما يعنى أنا هروح كده على عمايا أشوف عريس معرفش ولو معلومه واحده عنه سنه كام ؟ بيشتغل ايه ؟ شكله ايه .؟ أى حاجه ! 

قالتلى لا مش هنعرف خليها لما نشوف ما الواحد بيسمع حاجه فى التليفون وبيكون الواقع حاجه تانيه خالص بس هو اسمه سامح وجاهز للجواز على طول وهذا هو المطلوب انجازه !

فمكنش ردى غيرصدقتى يا حاجه وربنا يستر عليا من انجازاتك ولما نشوف طنط شريفه أخرتها ايه ويارب يطلع سامح ابنها فله .. مش قله يارب !

المهم ان ماميتو بتاع الأنا اتفقت مع طنط شريفه على المعاد فى النادى كالعاده ما هو ده مقر الحزب لرؤيه كل عريسى النيسى كوانيسى .. وأنا طول الطريق قلبت على الست شادية وبغنى سونه يا سونسن جتلك اهو قبل معادنا كمان هنا اهو وفضلت أدى نفسى أمل إنه هيغلب كل أبطال المسلسلات التركيه وهيكون حاجه كده جنتل مان ورومانسى ووسيم وحاجه كده تشرح القلب تخلى الواحد يعتصم معاه طول العمر مش يقضيها ثورة منزليه ومظاهرات فى الصالة وقنابل مسيله للدموع فى الشقه ! 

المهم وصلنا ولقينا طنط شريفه وابنها واقفين عند باب النادى زى ما اتفقنا وسلمنا ودخلنا قعدنا .. وبينى وبينكم سامح طلع فله شمعه منورة ;)

طنط شريفه وماما طبعاً فضلوا مع بعض لوك لوك لوك وأنا سامح استلمنى ابتسامه ونظرات من الآخر كده شكله اعجب بيا على طول وقعدنا نتكلم عن هواياتنا وأحلامنا وكل أمور الحياة وكانت كل القعده هاديه وجميله كان ناقص حد يعزف لينا كمنجه ونقرأ الفاتحه بعدها ولولولى .. وكتبلى أميله على الفيس بوك علشان أضيفه وأشوف نشاطاته وأفكاره وأديله لايكات .. وكومنتات . وبوكات !

بس زى ما بيقولوا المنحوس منحوس ولو على رأسه فانوس .. وإحنا زى العصافير بنصوصو مع بعضينا .. فجاءه موبيل سامح رن.. ولقيت نغمه موبيله 
اللي ضحي لأجل وطنه لأجل مايعود النهار واللي اسم مصر دايما كان له طاقة لأنتصار اللي حلمو حلمنا واللي فرحو فرحنا اللي نهر النيل بيجري جوا دمو ودمنا يبقي واحد مننا ايوة واحد مننا !

ولقيته بيقول اه زى ما اتفقنا يوم الجمعه هنتقابل كلنا مع بعض من مصطفى محمود ونطلع سوى على العباسيه !

ولقيته بيبتسم وبيقولى ما تيجى معانا ! قلتله أجى فين ؟ قالى زى ما انتى أكيد عايشه وشايفه اليوم المشئوم يوم نكسه 25 يناير وشويه الخونه .. العملاء .. الماسونيين عملوا ايه فى بابا وماما وفى البلد !

أنا طبعاً مكنش عندى غير رد واحد هـــــــــــــــــــــــــار أســـــــــود !

وقلبت على عمر الشريف فى فيلم اشاعه حب وقلتله بــابا مين ؟ وماما مين ؟
ونكسه مين ؟ قالى بابا مبـــــــــارك وماما سوزى !

وفتحلى الموبيل ولقيته بيورينى صورة الموبيل حاطط فيها صورة ليه مع مبارك !

واتنهد كده وبصلى وقال شوفتى عملوا ايه فى بابا مبارك .. فى نســر مصــر ! 

قلتله قــــــــــول والمصحـــــف ! بقى أنت عايزانى أنــــــــــا بعد سنة ثورة ونزول تحرير وثورة على الفيس وحرقه دم ويسقط يسقط حسنى مبارك ودموعى على الشهداء والمصابين لما صوتى راح .. أخرتها أبيع الثورة وأجى معاك العباسيه مع ملك ملوك العباسية توفيق عكاشه وأنثى العكش وصبايدر وعمرو مصطفى والشيخه الشريه ماجده اللى مكشوف عنها اللحاف وأقول أنا آسفه يا حزومبل ؟ قصدى يا مبارك ؟ 

راح قام ووقف كده وقال بصوت عالى الحقى يا ماما دى طلعت منهم ؟ 
قلتله أومـــــــــــال منكم أنتوا يا موكوسين ! 

قالى أخدتى كام وجبه كنتاكى وكام يورو ؟ ضحكوا عليكى وخلوكى تخونى أبوكى ونسر مصر ؟ نسيتى الضاربه الجوية ؟ نسيتى الكبارى ؟ نسيتى اختارناه .. اختارناه ! ونسيتى ماما سوزان والقراءه للجميع !

روحت قايماله أنا كمان يا سلام هو أنا هخاف منه الفله ابن الفله ده ولا ايه ؟وقولتله أنا مش خدت وجبات أنا أخدت كوبون مدى الحياة لكنتاكى وهارديز وبيتزا هت كمان .. وهما ضحكوا عليا فعلاً وخلونى أخون جوز أمى مش أبويا ! 

وعمرى ما هنسى الضاربه اللى انضربت فى قلبى وقلب الشعب 30 سنة من فقر وجهل و محسوبيه وعنوسة وظلم وأمن دوله وفساد وسرقة .. ! 

والكبارى أه والله دى كمان استحاله انساها هو أنا أقدر أنسى كام مرة كنت أنا وغيرى بنروح هناك علشان ننط من عليها ونرتاح ونريح البلد مننا ؟ 

ولا كام مرة روحت وشفت الشباب والبنات فى حاله حب مؤبد لحين الافراج عن شقق ووظيفه علشان ياخدوا براءه الجواز !

وعلى رأى المثل لا اختارناه ولا بايعناه نجح ازاى بالتزوير سبحان الله ! 
وعمرى ما هنسى مشروع العنوسة للجميع ومشروع جمعيه المرأه المتوحشه للجميع!

قالى بس أنا كسامح .. مسامح ! قلتله وأنا كا كوكى .. بلطجى ,, مفترى !

وفجاءه طلع صوت أم المحروس هى كمان وقالتلى لاااا كله إلا الرئيس مبارك برئ ودى مؤامرة عليه وعلى الحزب الوطنى اللى كل شئ عمله كان من أجلك أنت ! 

ولسه هرد راحت ماما بصالى وقالتلى أسكتى أنتى خالص .. وقالتلها واضح ان حضرتك الشريفه ماجده ! هو جوز حضرتك بالحزب الوطنى ؟ ردت طنط شريفه وقالتلها بلا فخر اه كان عضو بالحزب الوطنى لحد ما النكسه دى حصلت للبلد ! 

روحت أنا وماما فى نفس واحد قلنا هـــــار أسود .. حزب وطنى .. أتارى بابا مبارك ! 
لاااااا إحنا آسفين يا عريس :)

وأخدنا بعضنا أنا وماما وطول الطريق ماما تضحك وأنا محروق دمى على الآخر ..كل ما افتكره وهو بيقول قال ايه أنا سامح ومسامح .. كتك ضربة جوية فى قلبك يا بعيد ..!

وقال أنا أفتكرتها الست شريفه أخت البطل رأفت الهجان طلعت الشيخه الشريه ماجده !

ورجعنا البيت من هنا وأنا جريت على النت من هنا علشان أشوف صفحه الفله ده فيها ايه ؟ ولقيت ماما بتقولى بس تصدقى يا كوكى العريس ده كان لقطه يعنى شاب وجاهز وكان شكله اعجب بيكى على طول كمان !

قلتلها تصدقى يا ماما وفى مميزات كمان تانيه يعنى مهما جوعته فى يوم ولا استخدمت معاه أساليب القمع ولا خنصرت من مرتبه من وراه ولا كل ما يطلب منى حق مشروع ليه أسمعه وأقول حاضر وبعدها أكبر مخى وأعمل اللى على مزاجى ولو خليته من غير كرامه قدام أهلى وأصحابى وكل غريب وقريب .. هيقولى أنا آسف يا كوكى :) 

ضحكت ماما وقالتلى طيب شفتى يعنى مهما تفترى عليه هيقولك آنا آسف يا كوكى وهيتحملك 30 سنة كمان .. قلتلها كان على عينى يا حاجه بس أنا كده إللى مش هقدر أتحمله 30 ثانيه أنا عايزة راجـــــل مش مــــــــــان !

وتعالى نشوف صفحته على الفيس بوك علشان حضرتك تضحكى وأنا يرتفع ضغطى أكتر ودخلت صفحته يا جماعه صفحته والقيه مشترك فى كل صفحات أنا آسف يا ريس وحاطط صورة بروفيله صورة للمخلوع مبارك ومكتوب عليها بلادى وإن جارت على عزيزة وأهلى وإن ضنوا على كرام ! 

ومشترك فى صفحه ميدان روكسى والأغلبيه الصامتة وفلول كافية وكارهى البرادعى وضد عملاء 6 ابريل وكلنا مبارك .........الخ

بينى وبينكم كنت عايزة أبعتله رساله أكتبله فيها عزيزة دى تبقى خالتك !
وقال أنا إللى كنت بقول هديله لايك وبوك ده لازم ياخد بلوك !

وماما طبعاً مستمرة فى الضحك وفرحانه كالعاده فى المقالب إللى بشوفها وتقولى ايه وماله ما يمكن كان يتحول لثائر على يدك :)

يالهويز عليا يا ماما يتحول مين إذا كان من أولها عايزانى أنضم لجماعه الفلول !
وشايفه يا ست ماما يعنى يوم ما يجيلى عريس فى ظل الظروف العصيبه التى تمر بها البلاد تجبلى واحد يوم ما هيخرجنى هيخرجنى فى ميدان مصطفى محمود وروكسى والعباسية ويقعدنى فى فلول كافية ! وأتأسف كمان ؟ 

ولما نتجوز يخلينى أتفرج على قناة الفراعين ! وأحط صورة المخلوع فى الصالون مع حمايا الفله ! 

ويوم لما أكتب على الفيس بوك من single >> engaged تكون لفله وأخلى أصدقاء الفيس بوك كلها تشمت فيا وتفتكر إنى أنا الطرف تالت وبشتغلهم إنى ثائرة !

وده أخلف منه ايه فلول وفلافل صغيرة !

لاااااا أنا عندى أضحى بنفسى وبقلبى وكله فداء مصر .. فداء الوطن .. فداء الثورة
ويا بلادى يا بلادى أنا عايزة أتجوز يا بلادى .. قصدى أنا بحبك يا بلادى :)

لو عجبتـــــــــــك ..  رأيــــك & شيـــــــــر ;)



ضع تعليقك

3 التعليقات:

ahmed fathy said...

رائعة بحق وفى تقدم مستمر


http://africa.clubme.net/t78-topic#82

Yomeat Banota said...

أشكرك يا احمد على رأيك واتمنى مشاركتك الدائما :)

Rania Ezzat said...

gamda gdnnnnnnnnnn :)

 

يــومــيــات بـــنــوتـــة Template by Ipietoon Blogger Template | Gadget Review