Monday, November 3, 2008

يــومــيــات بــنــوتــة 2

مرسلة بواسطة pakinam ismail في 4:42 PM

رجعتلكوا تانى طلع البواب جاى ياخد الشهريه بتاع النت اصلى بلا فخر مشتركه فى الدى اس ال مش دايل اب شفته بقى مش اى حد .
المهم كنا بنقول ايه يا بنت يا كوكى اصل ولاد الايه لغبطولى مخى اكتر ما هوه متلغبط أصل أنا ناقصه ولا ناقصه .. اه افتكرت لقيت شوشو بتتصل بيا يوم أجازتى الساعه 10 صباحاً حتى الأجازة مش سينى فيها أنا خير اللهم إجعله خير أنا بحلم ولا العمارة بتقع ولا مين الرايق إللى بيتصل كده على الصبح؟؟


قلت ألو بالعافيه والله ولقيت الست شوشو أم الكتكوت ياسين بتقولى إنتى لسه نايمه يا كوكى ولا إيه ؟؟ ده على أساس إنى هقوم أوزع الجرايد ولا أبيع اللبن ولا أمسح العمارة مش فاهمه أنا .. دى حاجه تجنن يا ناس !!
قلتها أكيد نفسى أنا طول الأسبوع شغل وصحيان من ال8 الصبح مش من حقى أرتاح شويه يعنى؟قالتلى بلاش كسل قومى نروح كارفور المعادى .. قلت ده مقام ده ولا إيه رايحه تدعى دعوتتين لجوزك كده ولا إيه ؟؟ضحكت قوى وقالتلى يا بت المول .. فقت بقى ساعتها أه مول فارفور.. قصدى كارفور .. أصلى عمرى بصراحه ما روحته .. أخرى سيتى ستار!! .
قلتلها على الصبح كده .. قالتلى الجو مشمس وعشان ياسين بقى نروح ندوخه.. فى الملاهى كده شويه .. عشان ربنا يهديه وياكل وينام بقى بدل ما احدفه من الشباك.. قلتلها على إيه قلبك أبيض أمرى لله هقوم أغسل وشى وأصلى وأفطر كده وأجهز .. قالتلى أوك .. 11 ونص هنزلك ونروح وجوزى هيوصلنا فى طريقه أصل رايح الشغل .قلت كويس لا هنتشعلق فى أتوبيس ولا نتزنق فى ميكروباص .. ولا هنتحايل على تاكسى .. كده خروجه ميه ميهوقمت وجهزت بقى واستعديت للملاهى ولقيت الساعه 11 ونص وقلت أكيد الباب هيخبط .. أبداً .. لا حس ولا خبر


أقوم وأفتح الباب وأتأكد من الجرس أنه شغال .. ألاقيه زى الفل .. سارينا والله .. اقول لنفسى الصبر حلو بردواوفضلت أهاتى مع نفسى لغايه واحده ونص وشوشو نازله تتمخطر والاستاذ ياسين معاها .. وتقولى معلش يا كوكى عقبال ما حميتو وأكلته ولبسته وجوزى صحى ونفس السيناريو هوه كمان .. قلتلها يا حلاوة أنتى بتصحينى أنا والبهوات عندك لسه نايميين وقدمهم الليله دى .. منك لله يا شوشو .. وطبعاً ضحكت قوى .. قلتلها ماشى هعديهالك المرة دىونزلنا وركبنا العربيه .. وفضل جوزها يسخنها ولا كأنه بيسخن .. حله محشى وخايف عليه يتحرق ؟؟ومشينا وشغلنا نجوم أف أم واستمعنا لحماقى واديها إيه .. عارفه أحلى فيكى إيه .. ......... قلتله من جوايا عارفه والله يا خويا بس اللى يقدر بس !!وياسو فضل يسقف ومش عارف يقول غير كلمه فيكى من الأغنيه كلهاوالأغنيه خلصت من هنا والثورة قامت من هنا مش ثورة سعد زغلول .. لا دى ثورة ياسوو زغلولراسه وألف دزمه .. هيه جزمه .. بس دزمة أشيك ..إنه عايز أغنيه فيكى تانى .. ويعيط ويتطنط ويقول بأعلى صوت فيكــــــــــــى أهــــــــئ


طيب ايه المطب ده نجبله منيين حماقى دلوقتى ولا نتصل بجيهان عبدالله ولا نجوم أف أم منيين ؟؟؟؟؟؟؟
وياحبيبى أسكت مفيش الواد ميكنش فاهمها قوى .. ولا بيحب من ورانا وإحنا مش عارفيين .. ده جيل ما يعلم بيه إلا ربنا والله .. المهم صدعنا وأمه تزعق .. وأبوة يزعق .. وأنا مقدرش أزعق .. روحت مسكاه وقعدت أغانيها وهوه يسقف .. ولا تقولولى حماقى ولا حسنى ولا دياب ولا حبيب قلبى فؤاد كمان .. وعارفه احلى فيكى ايه .. قمر ده ايه اللى تتساوى بيه .. المهم وصلنا الحمد لله عند البوابه والملاك البرئ اللى معانا راح فاتح الباب وانطلق .. وأمه ماسكه شنطه كبيرة فيها حاجاته ومش عارفه تنزل .. وباباه فى عربيه وراه يعنى نفس الحاله مش هيقدر ينزل يلحقه ..ما فيش غير أختكوا الغلبانه أنا طبعاً .. وجيت أفتح الباب عشان أنزل ‘إنه يفتح أبداًًًًًًًًًًًًًًاًااااااااااااا أتارى لازم حد يفتحه من بره .. قلت هوه يوم باين من أوله .. وراحت شوشو نازله وماسكه الشنطه وقالتلى .. ألحقى ياسين !!قلت ألحقه فين ده صاروخ وأنطلق .. أنا كان مالى ومال فارفور .. ولا كارفور ده .. مالها قعده البيت يا ناس .. روحت نازله ومنطلقه؟؟؟
استنوا الدنيا هوا قوى وتراب قوى لما اروح واقفل الشباك بسرعه بدل ما ادبس فى تنضيف الشقه.. وأدعى دعوتين..

ربنا ينولى إللى فى بالى؟؟ قولووا أمين…..

وهرجعلكوا تانى أوعى حد يمشى !!


ضع تعليقك

17 التعليقات:

Unknown said...

7elwaa ya koky ana zyek kda belzabt bs m3 welad e7'watyyy arb3a brdo w metala3in 3inina :D

Unknown said...

ana msh 3rfa 7teftekriny wla la2 ana sarah bekhit mn facebook ;)

pakinam ismail said...

اهلا سارة اولا مرسى انك نورتينى المدونه

ثانيا مرسى للكومنت الجميل منك

ثالثا تعالى نعمل رحله بقى الى جزيرة الواك الواك

عشان نرب من العيال السكر دى

:))

رابعا يارب تتابعى باقى اليوميات وتشاركينى بردك دائما

:)

pakinam ismail said...

اسفه سارة انا فاكرة الاسم؟

بس انتى مش مضافه عندى ؟ صح؟

Anonymous said...

very good stuff

Anonymous said...

gameela awy ya koki. ana 23dt ad7ak gamed.mestanya elba2y.
ana wesam 3la fekra

pakinam ismail said...

اهلا وسام مرسى يا جميله على المشاركة الحلوة دى بس اعملى حسابك المرة الجايه الضحك بفلوس

:)))

وياريت تشوفى الجزء الاول وانتظرى الجزء التالت قريب ان شاء الله

ونورتينى بجد يا جميله

Anonymous said...

gameela awee ya koky

pakinam ismail said...

مرسى ايمان ويارب باقى اليوميات تعجبك يا جميله

Moon said...

ايه يا بنوته ده انتى كل خروجاتك مضروبة كده بس متجبيش الحق على فرفور ده حتى هو مفرفر لوحده ههههههه انتى على فكرة صعبتى عليه خالص مالص و اكيد بالص و شكلى كده هخدك افسوحك فى حديقة الحيوان و اركبك السيسى و العبك كل الاعاب كيك على العالى و جاتو كمان

pakinam ismail said...

مليش بخت يا مون اعمل ايه ولا مع فارفور ولا كتكوت حتى

الامل والبركه فيكى بقى

:)))

ايوة كده انا بردوا لسه بنوته من حقى اتفسح يا ناس

:)

أية جمال said...

هههههههههههههه
اما ياسين ده عليه عمايل
ربنا يكون فى عونك
واجرى بقه عشان تلحقيه فى فرفور

pakinam ismail said...

اهلااااا ايه مرسى لمشاركتك الجميله وضحكتك الاجمل ويارب باقى اليوميات تعجبك

:)

Sherry Ayman said...

يا عينى عليكى يا كوكى يا غلبانه حتى يوم الاجازه اللى الواحد بيحلم بيه طول الاسبوع مش متهنيه عليه
بس ياسين شكله قمر خالص وعرف ينسيكى النوووم

بجد جميله اووووووى يا كوكى

Butterfly said...

ههههههههه

حلوة اوى

انا جبتك من الاول خالص

Unknown said...

هههههههههههههههههههه كان يوم باين من اوله معلش خليها عليكي

pakinam ismail said...

تحياتى للجميع وسعيدة بوجودكم ومشاركتكم الجميلة واتمنى تعجبكم كل اليوميات الجديدة :)

 

يــومــيــات بـــنــوتـــة Template by Ipietoon Blogger Template | Gadget Review