Wednesday, November 12, 2008

يـــــومـــــــيــــــات بــــنـــوتــــة 3

مرسلة بواسطة pakinam ismail في 9:30 PM


احم احم .. ادينى شربت شوب تراب عشان ادعيلكوا وجيت اهه ويارب دعواتى توصلكوا كده .. ده أنا دعيت عليكوا كام دعوة .. أوبس قصدى دعتلكوا يا حبايبى يا نور عنيا طبعاً
روحت نازله ومنطلقه؟؟؟ وملحقتش اقول حتى 1و2و3 .. ولا أخد حتى انفاسى وياسووووو بيجرى وانا ايه ماشيه زى العسكرى خطوات طويله سريعه .. والواد ايه ما شاء الله فوريرة .. فتح على الرابع و الست مامته ورانا ماشيه بشويش من الشنطه اللى معاها وانا طبعاً مكنش قدامى غير انى عملت زى فرافيروووووووو وقلت انا جاااااااااااى !!
وجريت وكأنى أم وملهوفه على ابنها اه والله ورحت قفشه فيه قفشه وخدته فى حضنى وكأنه كان تايه ولا حاجه ولا عامليين زى احمد .. منى !! المهم شوشو وصلت لينا بالسلامه الحمد لله والكتكوت عمال يقول ملاهى .. ملاهى وشوشو راسها والف سيف اننا نعمل شوبينج الأول وبعديين الملاهى .. وانا فى النص محتارة بينى وبينكم انا كنت عايزة الملاهى زى ياسوو .. ما انا لسه صغنون بردوا وعايزة ألعب شويه من نفسى .. والشوبنج ده الواحد زهقان منه خالص مالصبس فى الاخر طبعاً سمعنا أوامر شوشو لأنها الكبيرة .. ودخلنا نعمل الشوبنج والكتكوت ايه ماشى كل ما يشوف حاجه يشبط فيها ولو قلنا نوووووووووو .. السرينه بتفتح على البحرى وهيلم علينا المول وبرستيجى يروح كده بقى !وفضلنا نتفرج ونشوف البيت عايز ايه خصوصاً الزوجه اللى معايا أم الكتكوت بتشوف بقى طلبات الأسرة الكريمهوانا بقى عينى رايحه على قسم الشيكولاته والحلويات بصراحه كان اجمد قسم وكنت عايزة اقلد الواد ياسو واشبط فى كل حاجه فى القسم ده وعلى السرينه مفيش اسهل منها افتح بقى واطلق العنان على طووووووووووووووووول
ولو شوشو مردتيتش تجبلى زى ياسوووو كنت هعمل مزيكه حسباله مين عاشر القوم بقى !!المهم خلصنا الطلبات وشيلنا شيله ما يعلم بيها الا ربنا وروحنا حطنها مع الامن بتاع الملاهى ودخلنا الملاهى .وانطلق ياسو للمرة التانيه وانا انطلقت قبله بصراحه .. والواد ايه قرينى والله عارف انا بحب ايه ويروح رايح وانا وراه فرصه بقى ورحنا ركبنا العربيات وقلت هوريه السواقه على أصولها بس ازاى الكتكوت يسبنى اسوق .. لازم يحشر نفسه ومسك هوه الدركسيون وعملت اروع الحوادث وكان فى كتكوت تانى بيلعب بردوا وباباه ماسك الموبايل وبيصورة والولد مبتسم على الاخر .. راح ياسو معجبوش طبعاً الابتسامه راح داخل فيه الواد بصلنا حته بصه ولا أبوة كان شكله هيسحب مننا الرخصه ولا حاجه بس أنا بسرعه لطافه ابتسمتلهم راحوا اتعدلو على طول ايه عايزيين يتخانقوا احنا قدها وقدود.. تعاليلى يا ماما !!خلصنا اللعبه وياسو مصمم يفضل قاعد والمسئول عن اللعبه عمال يبصلى عشان العيال التانيه تركب وده احايل فيه واستعطفه وهوه دزمه فين بقى .. لما اتكرم وقام وراح جرى على لعبه تانيه.. وراحت شوشو قالتلى سبيه يلعب براحته وتعالى نلعب احنا ولعبنا باسكت والكور يا سلام دماغها دزمه زى ناس كده اعرفها مش راضيه تدخل فى الشبكه قلت يمكن قواعد الباسكت اختلفت والمفروض اانا مندخلش الكورة فى الشبكه والله كل شئ جايز فى الزمن ده !!وخلصنا لعب يعنى فارفور ده مفهوش لعب كتيير قوى وقلنا نروح ناكل بقى ولا هنصوم يعنى وللا هنصوم !!
راحت شوشو جايبه ماك وانا هارديز وقعدنا وياسو مسك البيبسى وقعد يشرب ولا على باله أى حاجه وشوشو تزعق وتقوله ارحمنى يا بنى هتغرق نفسك طيب خد السندويتش ولا الفرايز وهوه ولا هنا كأنها بتكلم نفسها يا عينى يا شوشو .. ويا عينى بصراحه على كل واحده متجوزة الحمد لله الواحد لسه قرى بس بينى وبينكم نفسى يطاع عينى زيهم !!المهم اكلته بالعافيه وهوه راح نط من الكرسى وراح يجرى حول التربيزة وبعدين فى كافيه كده راح ياسو راح وخد اكياس سكر من التربيزة بتاعت الكافيه .. ويجى يدلنا ويروح تانى وشوشو راحت قايمه تجيبه يروح هوه جارى لغايه ما مسكته وجبته قعد يزن راحت سيباه راح رايح تانى جايب السكر متقولوش الواد بيجبلنا التموين بس ايه التموين كله سكر .. مفيش شاى ولا نسكافية طيب يا ياسو .. ولا قزازة زيت حتى !!
غلبنا الواد ده قوى بصراحه وراحت شوشو قالتلى انا هكلم جوزى زى ماقالى عشان يجى يروحنا بقى يادوب نروح نرتاح واخمد الكتكوت ده قلتلها اوك مفيش مشكله ومسكت الموبايل وبتتصل والست الأمورة اللى انا بعشقها صراحه ونفسى أشوفها وأخنوقها قالتلنا الجمله اللى حضرتها مش حافظه غيرها الموبايل ربما يكون مغلقاً او خارج نطاق الخدمه يرجى المحاوله فيما بعد؟ راحت شوشو وخده موبايلى ولقينا الامورة بردوا بتقول نفس الكوبلية بتاعها .. والحظ ان الشبكه كلها كانت واقعه .طيب هنعمل ايه يا شوشو قالتلى مش عارفه .. قلتلها تعالى نطلع بره يمكن الشبكه تلقط وخرجنا بره المول وبقيت ماسكه الموبيل وعماله اوجهه وكأنى ماسكه أريل ولا حاجه وبظبط اريل التلفاز !!وفضل على نفس الحال .. والواد ياسو بيتاوب وبينام حضرته .. روحنا موقفين تاكسى .. وحطينا الشنط وركبنا ومشينا الحمد لله
ودماغى عماله تدق وكأن فى ايد هون جوه رأسى .. وشوشو مقريفه من زن ياسو .. زنه النوم بقى ما خلاص الباشا لعب واتسلى واحنا تحت امره بقى .. وصلنا الحمد لله وهوه عمال يفرك ومش راضى ينزل من التاكسى معرفش ليه رخامه وخلاص ونزلناه واتأسفنا للتاكسى ومسكنا الشنط .. وطلعين لسه على اول سلمه فى العمارة والبيه عمال يزن شوشو شلته وانا ادبست فى الشنط .. وطلعت وقلتلها سلام .. وفرصه سعيد وخروجه اسعد .. وتوبه من دى النوبه !! ولا كارفور ولا فارفور ولو ايه .. توبه اخرج مع عيال ولا ستات تانى ..انا مالى انا بالشوبينج بتاع البيت وتعالى يا واد .. وعيب يا زفت ..انا لسه يا خواتى بنوته صغيورة ومدخلتش دنيا بردوا .. يبقى يعقدونى من أولها ليه بس كده !!ودخلت الشقه ولسه بقول يا هادى والاقى بيرو بتكلمنى وقال عايزانى اروح ..........؟ قلتلها لازم النهاردة ؟؟
استنوا اعمل شاى ولا نسكافيه يحسن شكلى هنام منكوا وأرجع أحكلكوا روحنا فين ؟! وعملنا إيه ؟!
اوعى حد يهرب هعرف ؟!


ضع تعليقك

9 التعليقات:

زفته وقطران said...

انا بحجز اول كومنت


بيني وبينك بقي حبقي ااقولك مين هي زفته

pakinam ismail said...

اهلا مش قادرة اقول يا ..... مين ؟

:))

بس حابه اعرف؟

وحجز اول كومنت واوكيه الحجز جاهز وفى انتظار الكومنت

وفى انتظار اعرف مين؟

mevo said...

واخيررررررر سجلت

ههههههههههههههه

حبيبتي المبدعه
حستنك من المزيد وحتلقيني معاكي في كل يوميه وبعمل كومنت اخيرا
بس بسرعه علشان متشوقه خالص

pakinam ismail said...

اهلااااا ميفووووووو اخيرا يا قمر نورتينى

مرسى كتير ليكى وتابعى اللى اليوميات اللى قبل دى

ومن عنيا انتظرى الباقى قريبا
:)

Anonymous said...

lazeza awiyyyy w kman beta7sal

pakinam ismail said...

مرسى ايمان لمشاركتك الجميله

Anonymous said...

بصراحه اسلوبك في الكتابه جميل جدا بتخليالواحد لما يقرا يحس انه جوا الحكايه وعايشها بجد تسلم ايدك وربنا يكرمك ويوفقك وحنستني المزيد منك

Unknown said...

ههههههههههههههه انتي حتة سكره ودمك زي العسل يا كوكي واسمك جميل جداااااً

pakinam ismail said...

:) ميرسى كتير يا ايه ده من ذوقك الجميل ونورتى :)

 

يــومــيــات بـــنــوتـــة Template by Ipietoon Blogger Template | Gadget Review