Friday, November 28, 2008

يـــــومـــــــيــــــات بــــنـــوتــــة 5

مرسلة بواسطة Yomeat Banota في 2:38 PM

يــــومـــيـــات بـــنـــوتــــة
(5)
بعد ما بقت يومياتى كلها مع جيرانى بمشاكلهم مع أزواجهم وأولادهم الكتاكيت السكر قوى طبعا زى ما أنتوا عارفيين . المهم انا اكتئبت فترة وخفت على نفسى كل يوم أحلام لاااااااااا أحلام إيه دى كوابيس قال ايه حلمت خير اللهم اجعله خير انى فى شقه كده من شقق المحافظه الجميله الحلوة قوى زى الكتاب ما قال معرفش كتاب مين بس ما علينا وقعده وبطنى قدامى شبرين كده مش القولون ولا حاجه لا ده حمل يا كسوفى وربطه راسى بالايشارب مش شياكه يعنى لا ده صداع بعيد عنكم وحواليا واد كده فاتح بقه ولا كبرى 6 اكتوبر وعمال يقولى جعان جعان يا ماما اااااااااه .. وبت كده غريبه عماله تخبط على بطنى وقال ايه افتحيلى يا ماما الباب عايزة انام !! تنام فين دى ده بطنى كومبليت !! وبضرب كده بعينى على الباب والاقى بسم الله الرحمن الرحيم حرامى ده ولا عشماوى واحد كده فتح باب الشقه وشايل بطختين كده يملوا العين !! لا يا خرابى دى بطيخه واحده والتانيه بطنه لااااااا كرشه وقال ايه بيقولى ايه يا هانم الدوشه دى والكركبه دى الواحد راجع من بره على اخره من المواصلات والدوشه والزحمه وغلوا الأسعار واجى هنا الاقى مفيش اى فرق عن بره ومدندشه نفسك ولبسه ايشارب الخروج فى البيت طيب ابقى قابلينى لو اشتريتى حاجه اخر الشهر!! يا خراشى الراجل ده مين وبيكلمنى كده مين ومبيشوفش كمان ده منظر واحده متزوقه ولا مورمه يا ناس ولسه هزعقله واقوله انت مين والعيال دولا مين ؟! وأنا إيه أصلا اللى جابنى هنا ؟! فين بيتنا ؟! وألقيه فى الاخر بيقولى وهوه بيرزع باب الاوضه حضرى الغدا يا هانم لغايه ما اغير هدومى وسكتى عيالك دولا .. كان يوم أسود يوم ما اتجوزتك ؟! يا لهوووووووووووى عليا ده جوزى أنا والمتشردين دولا عيالى ؟! ده أخر صبرى ولا ايه لاااااااااا ولقيت اللى بتضربنى على وشى وتقولى فى ايه وفتحت عينى لقيت واحده بتقولى لااااااا على ايه مالك يا بنتى ؟!
قلتلها وانا برتعش من الخضه أنا فين ؟! أنتى مين ؟! أنا مين سلامتك يا بنتى مش عارفه أمك ؟! ماما أهئ أهئأنا مش عايزة أأأأأأتجوز يا مامااااااااااااا !!!!!! ولقيتها ضحكت قووى وقال ايه حوشى حوشى واقفين لحضرتك على الباب .. ولا شيفاهم قعدين على الرصيف .. اقومى اقومى أغسلى المواعين اللى فى الحوض وشوفى بيتك محتاج ايه؟! وسابتنى وراحت على اللفينج روم غرفه المعيشه يعنى اصلى انا مثقفه !! تتفرج على التلفزيون ايه ده حتى انتى يا ماما ؟! بس واقفين فين ؟! ورصيف ايه ؟! ومواعين ايه ؟! وبيت مين ؟! ده على اساس ان عريس المستقبل من اللى بيحبوا يقفوا فى طابور العيش ولا اخره متسول على الرصيف ؟! وخلاص وظفتى الأساسيه بقت هاوس كيبر ؟! وقال بيتى !! هوه خلاص بقى بيتى !! طيب هوه ايه بيتى بس بالكلام طيب أين المستندات وحق الملكيه يا ناس ؟! لا بقى طالما الحكايه كده وهنا هغسل وفى بيت اللى فى الحلم هطبخ لا خلينا فى بيت الحلم احسن على الأقل فيه بطيخ !ياااااااهووووووووو عقلى هيشت منى خلاص وأنا مش ناقصه !! لا أنا هقعد أكلم نفسى كده وأهرى وأنكد فى نفسى لا أنا هروح أطس وشى بشويه ميه عشان أنسى عشماوى والعفاريت الصغيرة دى وأشوف أنا كمان التلفزيون فى إيه أنا صغيرة يعنى ولا صغيرة !! وقمت كده لا قمت ايه ده أنا جريت على الحوض غسلت وشى يجى 10 مرات .. وبرفع رأسى ألقى مين فى المرايا جوزى !! جوزى مين قصدى عشماوى البيه لسه بيسألنى على الأكل .. يخربيتك أنا مالى أنا مش مرات حد !! روحت منزله راسى فى الحوض وقلت مبدهاش اغسل راسى عشان يطلع من نفوخى الفجعان ده !! ورفعت رأسى تانى لقيته لسه واقف !! هوه بعينه برخمته بشكله الغلس .. روحت بكل هدوء ماسكة الفوطه بتاعتى ونزله ضرب فيه .. وصرخت فيه قلتله أطلع من رأسى .. مش عايزاك .. مش عايزاك .. طلقنى يا أخلعك !!ولقيت اللى بتقولى يا مصبتى أنتى يا بت أجننتى خلاص .. طيب اتجوزى الأول يا موكوسه وبعدين أبقى دورى على الطلاق .. وأعملى برم وأبقى أخلعى !! اتكبست قوى وكنت هطق كده يا ماماتى حتى أنتى يا أماااااااااه !! قلتلها أنا مش موكوسه هيه بس النفس مش أكتر !! وراحت مزعقه فيا وقالتلى حسبى كده حسبى الواحد مش ناقص مراره خلينى أتفرج على المسلسل ايه ده أنا للدرجه دى بقيت مرارة !! ومسلسل ايه مش تشوف مسلسل الرعب بتاعى الأول !! ماشى يا ماما لما أشوف بقى مسلسل إيه ده اللى شدك قوى كده عن بنتك وكوابسها !!روحت واخده المشط وقعدت لما أشوف أنا كمان ولسه بقلها ده مسلسل ايه يا ماما قالتلى اتفرجى من سكات واتعقدى شويه ؟! طيب اسمه ايه وهسكت على طول ؟! قالتلى نور ؟! قلت نور والست نور دى أهم من كوكى بنتك فلذت قلبك !! لما نشوف نور دى حكايتها ايه ؟!أسكت ماشى مش مشكله لكن أتعقد هوه ناقصه عقد !! ده أنا أكتر واحده فيكى يا مصر عندى كلاكيع وعقد .. بس أهه الواحد بيحاول يتفائل !! وبحاول أشرب من نيلها وأغنلها وأطبخلها وأغسلها واكولها !!ومن أول لقطه يا ناس أتعقدت على طول ايه ده ايه ده ؟! ايه اللى بيحصل ده اللى أنا شايفه ده .. ده غزال عمال يتحرك .. ويا غزال يا غزال ده العشق حلال ولدى يا ولدى .. أوبس إيه البيئه إللى بقيت فيها دى !! بس اعمل ايه ؟! ايه بطل المسلسل ده ولا البيت اللى عايشين فيه والبحر كده حواليه .. هيه دى العيشه .. وهيه دى الرجاله شياكه ايه .. رومانسيه ايه .. ضحكه ايه .. كتنا نيله فى حظنا الهباب .. هوه ده مش مسلسل الرعب اللى وقعت فيه .. قعدت أتابع وأنا كلى حصرة على شبابى .. ولقيت ماما بتقولى انتى بتحاربى ولا بتسرحى .. لا بتخانق يا ماماااااا !!وقعدت يا أخواتى أتفرج وأتفرج على الجو الرومانسى واتعقدلى حبتين من الورود والكلام والحلو اللى الواحد مبيسمعوش وشكله مش هيسمعه ولا حتى فى الأحلام !! وسرحت شويه وقلت لما ابص فى المرايا كده واشوف الست نور دى احلى منى فى ايه يعنى ؟! على الأخ مهند هيمان كده ؟! امال يعنى البلاوى اللى عندنا بيتأمروا على ايه ؟! عايزين رشاقه .. وشعر جميل .. وعنين معرفش سمبوكسه !!وهما كلهم شبه عشماوى اللى شفته فى الحلم !! الرحمه من عندك يارب !!وقعدت اكل واهرى فى نفسى .. لقيت ماما بتزودها عليا بتقولى ايه رأيك فى الواد الحليوة ده ؟!راح كبريائى بقى وكلنى والروح الوطنية أخدتنى .. قولتلها حلوة فين عادى يعنى ياما عدى عليا نفس الشكل وأحلى كمان .. بس الروح بقى جنود مجنده !! وحياتكوا لا أعرف ولا جندى من الجنود دولا ولا شفت ولا حاجه بس لازم الواحد يعمل لنفسه سمعه كده ودعايه .. ما كل البنات بتقول كده جت عليا يعنى وهيقولوا فشاره .. دى كدبه بيضه .. ورفع من معنوياتى يا ناس غلطت أنا يعنى راحت ماما بصالى كده وقالتلى ربنا يشفى الظاهر الحاله اشتغلت .. قلتلها اه هيه الحاله اشتغلت ووقفت فى البلكونه كده وقعدت اكلم نفسى .. وقلتلها يمكن يابت كوكى تضرب معاكى محدش عارف .. يمكن نقابله فى اى مكان صحرا كان ولا بستان !! لغايه ما لقيت بتاع الأنبايب معدى وبدل ما يقول أنابيب قال العنب العنب وبصلى وضحك .. قصده ايه الموكوس ده بالعنب وبيضحك على ايه ؟! حرام أفك عن نفسى شويه لا جوه ولا بره !! أروح فين يا ناس بس ؟!وقلت أسمع نجوم أف أم لقيت الست نوال الزغبى عايشه نفس الحاله وبتقول تيجى منك وإزاى تيجى منى أنا دى الواحده بتستنى وبالسنه يتقلها ولو كلمه حنينه من اللى بتحبه وعايزاه ) لسه عينى هدمع روحت قفله الراديو على طول .. يعنى حتى أنتى يا نوال مش لاقيه .. طيب كده فى أمل بقى !!وشويه ورن جرس التليفون وجريت قلت يمكن حد من صحباتى .. أفضض معاهم شويه .. ونحط همومنا مع بعض .. ما أحنا ملناش الا بعضينا !! الو .. مساء الخير .. مساء النور .. كوكى معايا .. احم احم أه بكل تواضع .. أهلا أهلا بالأمورة .. اللى بسمع عنها كلام كتير جميل .. وشوقنى أشوفك وحكيت لأبنى كتير عليكى ههههه !! ايه ده النمرة غلط ولا إيه ؟! بس أنا كوكى يمكن تشابهه أسماء ؟! بس طالما قالت ابنها يبقى أنا كوكى اللى هيه طلباها .. ولا النمرة غلط هخليها أنا صح .. هما فاكرينها سايبه ولا سايبه يطلبوا الناس كده ويقولوهم كلام حلو وبعدين تطلع غلط !! لا ده انا من عيله محافظه وطالما سمعت بس صوتى يبقى لازم تجيب ابنها القطوط وتيجى فوراً !! المهم انا ضحكت وقلتلها بخنفان أصلى لما بكون رقيقة بخنف .. قالتلى ماما موجوده قلتلها طبعا .. وفى سرى لو مش موجوده أجبهالك على عنيا .. يا حماتى .. ههههههه خلاص طالما شكرت فيا تبقى حماتى مع سبق الأصرار والترصد !!وجت ماما وكلمتها وطول المكالمه هههههههههه الله يخليكى هههههه ه من ذوقك بس والله ههههههه احنا هنقضى المكالمه كلها ههههه وهههههه مفيش الواد ابنك كام سنه بيشتغل ايه ؟ عنده شقه ؟ عربيه ؟ طيب حتى أسمه إيه لغايه ما قالتلها والله هقلها وأشوف بردوا أخد رأيها مبدأيا وأرد على حضرتك ؟! ولو بردوا مفيش نصيب احنا صحاب بردوا ههههههههه ؟! صحاب ايه يا ماما ؟! احنا خلاص يا حاجه ناقصين صحاب !! بس برافوووا عليها عملتلى برستيج بردوا أن الرأى الأول والأخير ليا بردوا !! يا حلولى يا حلولى !! وراحت ماما قافله السماعه قلتلها على طول احكيلى كل حاجه ؟! قالتلى متفرحيش كده عشان اصل فى حاجات مش هتعجبك !! رحت محبطه وقلتلها خير اللهم اجعله خير .. ماله الأستاذ ؟!قالتلى أولاً بيشتغل ............؟!! وسنه .............؟!!! يااااااااااا كوكى انتى مغسلتيش المواعين ؟!!!!!!1 يوووووووووووه مواعين أيه اللى أغسلها ده أنا عايزة أغسل دماغى من الكوابيس .. كوووووكى .. حاضر جايه أهه حاضر !!!
بقلكم هغسل المواعين وراجعه ولو فى حد جدع يشمر ايديه ويجى يساعد وأنا هحكيله الأستاذ طلع إيه؟


ضع تعليقك

12 التعليقات:

eman abdelwahab said...

da anty 7altk sa3b 7'als

Yomeat Banota said...

اهلا ايمان نورتينى يا جميله ومرسى ليكى

ده حال كل البنات مش حالى انا لوحدى

ربنا يستر تابعى باقى اليوميات الجايه

وانتى تعرفى ان الحاله صعبه قوى

:))

emy khokha said...

والله فعلا يا كوكى نفس اللى بيحصل لكل بنات جميل قوى اللى كتباة دة عاجبنى كانى بقرا حاجات عن نفسى والله ضحكتينى :)

emy khokha said...

بس بليز قولى هو طلع اية جدو ولا اية جتهم نيلة عرسان الغفلة ههههه

Yomeat Banota said...

تسلميلى يا ايمى ويارب باقى اليوميات تعجبك وتضحكى معايا ولو لحظه

هههههههههه جدوووو لا هتعرفى قريب الكارثه وهستنى رايك فى الجاى كمان

ويارب يعجبك دايما

:)

Anonymous said...

هاى كوكى فين بقيت الايام انا مشتاقة جدا اعرف العريس ده طلع اية وبجد انتى جميلة اوووووووووووووى

Yomeat Banota said...

اهلا بيكى مرسى يا جميله انتى مقلتيش اسمك كنت حابه اعرفه واتشرف بيكى

ومرسى بجد للكلام الجميل ده

وهتعرفى قريب جدا

انتظرى المفاجأة

:))

السنونو said...

انا فطست من الضحك يا كوكى ومستعدة اغسلك المواعين كلها علشان أعرف

Anonymous said...

كوكى انا سارة بجد انا حتجن واعرف انتى فين كل ده يالة بقى عيزين نعرف

Yomeat Banota said...

مرسى سنونو ومرسى سارة على المشاركه الجميله وانتظرو المزيد قريب ان شاء الله

Anonymous said...

بجد اليوميات جامده مووووووووووووووووز ... انا لسا مش خلصتها بس هي من اولها جامده :)

Yomeat Banota said...

مرسى للكومنت انا مش عارفه مين للاسف مفيش اسم بس اتمنى تعجبكم دائما

 

يــومــيــات بـــنــوتـــة Template by Ipietoon Blogger Template | Gadget Review