Thursday, March 19, 2009

يــومــيــات بــنــوتـــــــة 7

مرسلة بواسطة pakinam ismail في 12:15 AM

يــومــيــات بــنــوتـــة
( 7 )

احم احم انا جيت عشان بس لو حد خالع راسه ولا حاجه .. جيت بعد ما قسيت واترفع ضغطى انا جيت .. خلصت
المسلسل بتاع الكتوكت مهند واتظبط ضغطى شويه .. وقلت اقف فى البلكونه حبتين اريح أعصابى .. بس المصيبه ضحكه الظبوطه مش عايزة تروح من بالى .. عماله اسمعها فى ودنى واتخيل شكله .. مش من جماله طبعا ولا حاجه .. دى ضحكته مسخه ودمه يلطش .. وعايز يتحاكم فى ميدان عام .. ابو شعره ده ؟!!!!
ولقيت البواب قاعد ومشغلى .. كتاب حياتى يا عين مشفت زيه كتاب .. الفرح فيه سطريين والباقى كله عذاب .. وهباب .. وكباب .. وياااااااا عين اااااهئ واهئ اهئ قول يا اسمر قول ونكد عليا يا خويا .. نفس الكتاب اللى عندى .. كتاب ايه ده انا عندى مجلد .. يا خويا أهئ أهئ
ولقيت ماما داخله تقولى وبتغنى كمان .. وبترقصى فى البلكونه ولا ايه ؟!
!!يعنى خلاص يا حاجه يوم ما هرقص هرقص على كتاب حياتى يا عين ..
وادى البلكونه مش قاعده فيها .. يارب انا بس هلقيها منين ولا منين ؟!!!! انا بس عملت ايه فى دنيتى ده انا بنوته بريئه وبراءه الأطفال فى عينيا بس مش أطفال 2008 لا اللى قبل كده بعشر سنيين ولا حاجه .. لان مفيش براءه خالص فى الجيل ده ..
انا بس حلمى صغير اقابل ابن الحلال اللى كده .. يسمعنى كلام حلو ويخرجنى .. ونرقص عى الشموع .. والجو الرومانتيكى ده اللى بنشوفه فى التلفاز كل ساعه .. واحنا يعنى من المغضوب علينا . ولا انا بنت البطه السوده يعنى .. ما أنا كتكوته أهه .. ودمى والله خفيف .. وبنعناع كمان .. وبعرف أعمل محاشى .. ومكرونات وكل اللى تحلموا بيه .. ومشرقه نهاراً .. وهادئه ليلا .. لطيفه طوال الفصول الأربعه .. ودرجه حرارتى سبعه وتلاتين طول السنه .. حد بقى يلاقى كل الأوبشنات دى فى الزمن ده ؟!!! يلا المنحوس منحوس ولو جابوله مليون فانوس !!!!!
المهم قررت اخرج كده اغير جو وأشوف صحباتى كده .. أفرفش معاهم .. وأشوف أخر أخبارهم .. ولقيتهم يا ساتر كل واحده عندها نفس الهم ايه يا بنات وحشتونى .. عامليين ايه .. يا ساتر ايه البوظ ده انا بكلم نفسى .. مالكم يااااااااااا قوم ؟!! لقيتهم ردوا عليا فى نفس واحد واضح انك رايقه وفايقه يا كوكى !! رايقه وفايقه مين .. والنعمه ما أعرفهم ؟!! لا يا حبايبى لا راايقه ولا فايقه بس أنا طفشانه من جو الكأبه اللى فى بيتنا وقلت نفرفش سوى .. مالكم خير .. ردت رودى خلاص انا زهقت أهلى كل شويه يتخانقوا معايا كل ما أرفض عريس .. خلاص كأنى بقيت حمل عليهم مش طايقيين وجودى فى البيت .. محسسنى إنى 50 سنة .. مش 23 سنه !! أنا عارفه أخرتها هنتحر !!
وقالولى هتعنسى .. أهئ أهئ .. يا خراشى ايه ده إحنا هنعنس ولا إيه يا بنات ؟!! نووووووووووووووو واااااااااااااى ده إحنا عرسانا كتير بس النفس مش أكتر ؟! وتنتحرى ايه يا هبله .. لا يمكن أبداً تنتحرى بسبب الرجاله اللى اتعمت .. لا ده إحنا لازم نفضل عايشيين وقاعديين عى قلبهم لغايه ما ينتحروا من أعلى جبل فى المقطم .. ليتجوزونا .. وبما أن الأنتحار من جبل المقطم حرام .. ساعتها هيلاقوا إن الأنتحار بجوازنا منا حلال حلال يا ولدى !!
وانتى يا دودو مالك ؟! مش لاقيه شقه عشان اتزفت واكمل واتجوز ؟! وأبويا عمال يزن خطيبك هيجيب الشقه امتى امتى ؟! ليه يا بنتى مش لاقيين ما الشقق ماليه البلد .. ما تروحى تحجزى فى إعمار .. ولا دريم لاند .. والأسعار تحفه وفى متناول الجميع !! كوكى انتى يا بت عايزة تفرسينى انا مش ناقصاكى كفايه ابويا !! أقولك ايه بس يا دودو الواحد من همه بيتريق .. ما إنتى لو ناصحه كنتى وقعتى عريس جاهز كده .. وعنده شقه
خلى بقى الحب الحب .. الشوق الشوق .. بلوبيف بلوبيف .. ينفعك !!!!
ااااااااه يانى هيه خروجه باينه من أولها ؟! المهم أختكوا بقى مسكتتش قعدت كده وحطيت رجل على رجل ..
وعملت فيها الدكتور الرخاوى
وهاتك يا نصايح .. قال يعنى البت حالتها ميه فل وعشره .. بلا وكسه .. كلنا فى الهوى سوى .. ايه يا بنات عادى أهلنا وخايفيين علينا .. ونفسهم يفرحوا بينا .. عادى كبروا دماغكواااااااااااااا
وبعدين كل شئ بالأتفاق إالا الجواز .. بالاتفاق .. ردت رودى ما انا يا كوكى بيمر عليا عرسان غريبه .. انتى هتقوليلى يا حبيبتى .. عارفه يا ختى النوع الغريب ده عرفاه .. بكل ألواناته !! طيب اهدى احكيلى يا حبيبتى .. قال ايه روحت قابلت عريس لقيته جاى لابس بدله كامله وحطتلى دبوس فى الجرافته كمان .. وعملى شعره على الجنب .. متقوليش الليله فرحه !! مش مهم يا رورو لزوم الشياكه .. عديهاله .. وبعدين .. قال ايه تحبى أبدأ أنا ولا تبدأى أنتى
هههههههه قوليله نبدأ سوى .. أنتوا هتلعبوا استغمايه ولا ايه .. كوووووووكى .. طيب سكتنا كملى .. المهم قال أنا أول مرة أقعد مع بنت لوحدينا !!!
الله أكبر .. ايه يا واد ده .. لا صبرتى ونولتى يا رورو .. هوه مش بيشتغل وبيروح ويجى .. وبعدين هوه انتى أول عروسه يشوفها ولا إيه ؟! ولا عايز يرسم عليكى إنه خام بقى ؟! ولا إنك نولتى شرف الجلوس مع سيادته !!
إيه يا بنتى الفيلم الأبيض وأسود إللى أنتى وقعتى فيه ده .. وبعدين .. ولا قابليين أتشليت من كلامه عن شغله .. وقعد يحكيلى عن الأدويه .. ليه هوه مريض كفل الشر يا رورو !! لا يا كوكى .. دكتور يا ختى .. يا حلاوة دكتور مره واحده .. بس ايه هوه نسى انه قاعد مع عروسه .. مش مع الممرضه أين الكلام المعسول .. منك لله .. عقدت البت .. وعملتى ايه ؟! ناديت ماما وخدها وقلت يا فكيك ؟! فى الاخر قالولى انتى بتتأمرى ليه ماله الولد مش عجبك عشان مؤدب .. ومثقف .. لازم يعنى يجيلك بالجيل فى شعره والشورت ولا إيه ؟! هههههههه صحيح يا رورو فيها إيه حد يلاقى أنور وجدى فى الزمن ده ؟! ودكتور .. يعنى علاج ببلاش .. وحقن .. ومرات الدكتور جت .. ولو على الكيميا ابقى غنيله .. الكيمى كميى كا .. الكيمى كيمى كو ..
ما تحيوا الكيميا ياااااااا هووووووو .. يا ستى كبرى دماغك .. طالما مرتحتيش نفسيا وشكليا .. يبقى بلاش منه .. الصبر يا بنتى .. قلتلهم امال لو سمعته حكايتى أنااااااااااا ..
وحكتلهم و طبعا فطسوا من الضحك .. واتريقوا طبعا عليا .. وقالولى من أعمالكم .. يا سلام ليه مالى ده أنا غلباااااااااان !!
وقلنا خلاص بقى عقد الجواز من شروطه يكون الشعر ناعم .. طويله رشيقه .. وضمان 5 سنيين مع قطع غيار متوفره بالأسواق !!!
المهم لقيت ماما بتكلمنى على الموبايل .. مش أنا معايا موبايل نسيت أقولكم .. حد بقى يلاقى عروسه معاها موبايل كمان .. وبكاميرا ؟!
كوكى تعالى ضرورى .. خير يا ماما مفيش بس تعالى .. خير ان شاء الله خير .. لهجت ماما كده حسستنى إن فى مفاجأة بس يارب تكون حلوة مش صدمه زى كل مره .. روحت مودعا الموكسيين .. يوه قصدى صحباتى .. وروحت جرى خير يا ماما .. البسى يلا حالا فى عريس .. هنقابله كمان ساعه كده ؟! ايه ده مره واحده كده .. طيب مين ده ؟ ولا جه إزاى ؟! يلا بس بعدين المهم انه جه . هتتدخلى كمان جه إزاى من عند ربنا
ما ربنا هوه اللى عالم بحالى ؟! إيه ده بقى هوه السى دى بتاع عائله رورو .. وصل عندنا .. يا مرحبا يا مرحبا ..
المهم لبست بقى وإتشيكت .. وقلت يا أرض اتهدى ما عليكى قدى .. حلو كده يا ماما .. أه حلو يا بت يا كوكى .. طول عمرك اتركتيف .. يعنى جذابه بس بالعنجليزى !!
أخيرا شهد شاهد من أهلها .. وارتفعت معنوياتى حبتيين .. ونزلنا فى النادى اللى جانبنا .. ولقيت عربيه حمره ايه .. روشه قوى .. اتجننت أول ما شفتها .. وأهلى اهلى .. أوووووووه .. أوووووووه .. أبو تريكه ده اللى جاى ولا ايه .. ونزل منها شاب طويل .. رشيق .. مقبول بصراحه .. مش بطال يعنى .. قعدنا واتعرفنا .. ولقيته بيقول عندهم بقى محلات بازار كتير فى الحسين .. ومعرفش فين وفين ؟! قلت يا دى الهنا يادى الهنا .. يعنى بيكسبوا طبعا كتير من السياح .. ما شاء الله .. أكيد بقى عنده شقه .. وجاهز .. يعنى فى شهر وأكون متجوزه .. كده يادوب .. بس يارب يكون رومانسى .. يحسن لو فيه كل حاجه ماعدا الجزئيه دى .. مش هوافق أبداااً .. المهم قعد يتكلم عن نفسه أنا شغلى كل يوم .. ماعدا الجمعه بقضيها فى البيت نوم طوووول اليوم .. طيب بتخرج أمتى .. مبخرجش .. طيب بتصيف .. لا بصراحه الشغل واخد كل وقتى ..
عندك صحاب .. مش كتير .. بتروح سينما .. لاااااااااا .. أنا حتى أخويا الكبير عنده فيلا .. العيله بتجمع عنده كل جمعه .. وأنا بقضيها فى البيت لوحدى .. وبيتحيلوا عليا أروح .. أنزل البسيين واقضى اليوم .. ومش بروح !! ايه الفقرى ده .. حد يقول للبسيين لااااااااااااااااا .. هيغمن عليا من الواد ده .. ده معقد نفسيا ولا إيه الحكاية ؟! هوه أنا ناقصه كلكيع .. يعنى إيه .. يعنى أنا أهم حاجه عندى الشغل .. وبحب الهدوء جداااااااااااااااا
يعنى ايه ..أصوم وأصوم .. وفى الاخر أقضيها فى البيت ؟! لا خروج ولا مصيف ولا اى حاجه ؟! وهدوء ايه .. أنا على كده هنقضيها مشاوره لبعض وبالهمس .. ليه فى السجن الحربى أنااااااا ولا ايه ؟!
استفذنى قوووووى وهوه مش على لسانه غير كلمه لا لا لا .. قلتله انت كام سنه ؟! قالى 27 سنه !!
طيب يا بنى ده انت لسه صغير على الهم ده .. ايه يا حبيبى .. تعالى لحمو يا حبيبى .. لما كل حاجه موجوده فى الحياه بتقول عليها لا لا لا
جايلى ليه يا حمو .. هوه حد مسلط المعقديين نفسياً عليا ولا ايه .. ولا معمولى عمل ولا ايه الحكاية ؟!
لقيت ماما نفسها استغربت .. وأنا بصتلها .. قلتلها يلا عشان الوقت .. رحنا مستأذنيين وإحنا جازيين على سنانا .. فرصه سعيده يا حمو!!
راح ماشى خد العربيه . اللى خطفت قلبى ومشى .. وراح راح .. خد العربيه وراح .. سابنى مفروسه وراح .. إهئ إهئ .. ياعينى عليكى يا عربيه .. من البيت للشغل ومن الشغل للبيت .. يا عين أمك عمرك ما أتركنتى عند مول ولا أى بلاج .. ربنا معاكى .. كل اللى صعب عليا قوى فى الوضوع ده الـــــعــــــربـــــيـــــــــــــــه !!!
ولقيت ماما بردوا بتضحك ؟! بتضحكى على ايه ؟! فرحانه فيا ؟! هوه ده اللى تعالى بسرعه .. هوه ده اللى جبتينى على ملى وشى ماشى يا ماما .. لن أنسى لكى هذا الموقف نهائى !! طيب يلا نروح .. روحت قايله بأعلى صوتى لاااااااااااااااا نروح فين كده .. لا مش كل مره تدبسينى فى قعده .. ترفع ضغطى كده .. وتقوليلى يلا نروح .. لا المره دى فى غرامه ؟!
هههههه غرامه ايه يا بت يا كوكى .. أه مليش دعوه تعالى بس وأنا هقولك غرامه ايه ؟!
روحت واخده الحاجه من ايديها الحلويين وطيران على محمصه كبيرة مشهورة عندنا .. ورحت داخله واخده شيكولاتات .. وطالبه لب وسودانى وحمص .. وحلويات .. قالتلى ايه ده يا كوكى .. ايه يا ماما ضربتيين فى الراس توجع .. والحاجات دى لازم عشان تظبطلى الضغط ..
وروحنا مروحيين .. وبقيت ماشيه أغنى للعندليب .. جئتوا لا أعلم من أين جئتوا ؟! قعدتوا لا أعلم مع من قعدتوا ؟!
هتجوز لا أعلم متى سأتجوز ؟! وأول ما روحنا روحت سابقه ماما قبل ما تقولها .. ماما افتحى المسلسل خلى الواحد يغير دمه اللى اتحرق ايوة يا مهند بيه عقدنى أكتر .. إحبطنى كمان وإفرسنى .. أمال أنت يا خويا مبتقولش لاااااااااا ليه .. ونور عاديه يعنى .. و شعرها خشن وهيه عملاه وساكت وصابر ليه ؟! مع إنك طول وعرض وشكل وكامل من مجاميعه .. ولاالواد من كتر حلاوته بيحب يحدق .. أمال الصناعه المحليه اللى عندنا .. مضروبه .. وإحنا ساكتيين .. وفى الأخر بيتأمروا .. يااالهوووويززززز .. عليكوا يا رجاله انتوا !!
لا الواد ده لازم أعرف إميله ولا تليفونه .. وأنصحه بردوا .. الواحد عنده بردوا اخوات شباب .. وأعمله دعوة يزور مصر .. تعالى زورنا إهئ إهئ ..ولو ليك صحاب زيك كده ولا قاريب .. مفيش أى مشكله والحساب كله عليا .. بس تعالى .. تعاطفك لوحدك مووووو كفايه .. أتبرع ولو بعريس
وأنا بردوا بحب أهدى النفوس .. ولا إيه ؟؟؟؟؟!!!!!!!


ضع تعليقك

6 التعليقات:

وردة said...

اول

تعليق


بعد


طول


انتظار

وردة said...

ضحكتيني والله يابنوتة
ربنا يكرمنا كلنا
الموضوع ده كبيييييييييييير
زي ما تقولي يابنتي
العرسان دول بينقونا مخصوص
انا حسيت اننا مستهدفين من نوعيه معينة
بس تصدقي
بينفعو برضو
علشان لما ان شاء الله نتجوز
ونخلف
نقعد نحكي لولادنا عن طابور العرسان اللي رفضناهم
هههههههههههههه
ربنا يكرمك
ويرزقك بأبن الحلال
سلام

pakinam ismail said...

اهلااا وردة اولا يسعدنى انك اول كومنت

ثانيا سامحينى للتأخير بس اوعدك الجزء الجاى مش هيتأخر عليكوا تانى

ثالثا مرسى لدعواتك وكلامك الجميل وههههه عندك حق عشان نحكى لاولادنا واحفادنا كمان ان شاء الله مغامرتنا مع اولاد الحلال عشان يعرفوا الجوازصعب ازاى

:))

ومرسى لمتابعتك الجميله وهستنى منك اول كومنت دائما

تحياتى

eman abd elwahab said...

wala yhmk ya koky bokra rbna ykrmk be2bn el 7lall in shaa alah

t_gad said...

جميل جداً والله .....ههههههههه
انا مش عارف بنوته زى العسل كده ازاى لحد دلوقتى ما اتجوزتش
إنتى عارفه انا لو مش مرتبط كنت ممكن افكر .....بس انا بمووووووووت فى خطيبتى ....و أوعى تفتكرينى بغيظك ولا حاجه ....انا بس بهدى النفوس

pakinam ismail said...

ربنا يخليها ليك وابقوا اعزمونى على الفرح وميرسى لمشاركتك :)

 

يــومــيــات بـــنــوتـــة Template by Ipietoon Blogger Template | Gadget Review