Friday, April 10, 2009

يـــومـــيـــات بـــنـــوتــــــــة 8

مرسلة بواسطة pakinam ismail في 5:15 PM


يــومــيــات بــنــوتـــة

( 8 )


انا بمسى التاماسى اجدع تاماسى يا احسن تقولوا اننا ناسى .. بعد المحاولات الفاشله فى ايجاد اسد الغاب طويل الناب
وبعد ما فشلت فى التفريق بين مهند ونور .. بس بينى وبينكم قدرت اوقع بينهم الكام حلقه اللى فاتوا ما شفتوش بعنيكوا ولا ايه ؟ ما انا السبب سيبكوا من اللى بيتعرض ده لكن خلف الكواليس انا السبب طبعا .. بس مهند ده معمله عمل غالبا مخليه مش عارف مصلحته .. اسالونى انا مدوباهم اتنين .. هما مين دولا معرفش !! المهم انا قررت منعا ً للاحباطات الكبيرة دى .. أنا أمسك الريموت وأغير المحطه .. وبقيت من متابعين سنوات الضياع .. ارحم بكتير من نور .. كلها فراق والحمد لله وقصص الحب كلها حزينه .. اللهم لا شماته يعنى بس ايوة كده عشان منحسش اننا اللى وحدنا اللى فاشلين .. الفشل وصل لتركيا كمان والحمد لله مش احنا وبس .. ومحدش احسن من حد بقى ...بصراحه موضوع الجواز والشغل والحياة كلها بقوا شئ يخنق خالص مالص .. انا هقضيها نوم واحلام احسن طالما الواقع مؤلم كده .. ولسه بحط راسى على المخده كده وشغلت المروحه عشات تهوى شويه من النار اللى الواحد اتسلق فيها .. ولقيت خير اللهم اجعله خير .. خناق وصويت .. قمت جريت جرى .. اشوف ايه اللى حصل .. ولقيت واحد ومراته بيتخانقوا خناقة جامدة قووووووى .. والست عماله تقوله انا مش طيقاك انا حياتى قبلك كانت جنه .. قال والبنات ملهوفه على الجواز قال .. يجوا يشوفوا الجواز اخرته ايه .. وانا بكل شغف عندى فضول فظيع .. ها اخرته ايه اخرته ايه ؟؟؟حرقة دم .. ونكد .. وهم .. وعيشه تقصر العمر يالهويزززززز كل ده .. على ايه يا ستى بقى .. يعنى ايه اخلينى كده احسن .. بس هوه مسكتش قالها امال انا اقول ايه .. كنت عايش حياتى .. مرتاح ولا عمرى جالى صداع .. طهقتينى فى عشتى كلها .. منك لله .. ليه ده بقى قلبنا على ريكو .. وطهقان زهقان مضايق .. خنقتنى وسدت نفسى ما انا كنت مدلع نفسى .. لااا بقى حيرتونى يعنى اصدق مين بس .. هوه ولا هيه .. تصدقوا هما الاتنين عايزين يروحوا الخانكه احسن .. وفضلوا يصرخوا ويصوتوا .. لغايه ما لقيتها بتقوله انت عايز تموتنى .. وروب سمعت خبطه جامده .. وبعدها مسمعتش نفسها تانى .. أوبس هوه قتلها بجد ولا ايه .. يالهوى بقينا فى فيلم فى عمارتنا قاتل ؟! وجريت على ماما بسرعه .. ماماااااااااااااااااااااايه كوكى بتصرخى كده ليه .. الحقى جارنا اللى تحت قتل مراته .. نعم روحى نامى روحى .. بقلك قالتله انت عايز تقتلنى وبعدها مسمعتلهاش نفسيا نهار اسود بجد يا كوكى .. اه تعالى بس نبص من ورا الشباك ياحسن يحس اننا عرفنا عملته السوده .. ويطلع يخلص علينا احنا كمان يا مامى !!ولسه بنبص ولقيته صوتها عاد من جديد .. وبيجلجل وهاتك يا شتايم يا ابن الايه .. وتيتتتتتتتت .. يا نهارك اسود انتى لسه فيكى نفس يا بنت الايه .. بس طبعا مش بنت الايه بتاعه تامر .. انتى مش خايفه يقتلك بجد .. ومسكتوش .. قلت يا خسارة مش كنت قتلتها وخلاص .. وكنت هشهد معاك وعليك .. متسألونيش ازاى بس هيه كده !!!!روحت داخله قلت تعالو شوفوا الجواز على اللى عايز يتجوز .. الحمد لله انا بنوته .. ومش مرتبطه ومريحه عقلى وخلاص .. وعايشه سنى وبغنى بعمل اللى بحبه واللى بحسه ودى حياتى انا .. على رأى طنط نيكول !!المهم دخلت انام ااحسن .. وأحاول احلاملى حلمين تلاته كده على الماشى يروقوا أعصابى .. ولسه هنام ولقيت الباب بيخبط .. طاااااااااااااااخايه ده بوليس ولا ايه هوه قاتلها ولا طلعت شاطرة وقتلته هيه ؟! وجريت فتحت الباب لقيت واد صغير كده بتاع 12 ولا 13 سنه معرفوش بيسألنى مهند عندكوا ؟!مهند ؟ مهند مين ؟ ياريت يا بنى هوه ده كان بقى حالى .. لا يا حبيبى هتلاقيه الساعه 10 على ام بى سى فور .. بشحمه ولحمه ...لا يا طنط مهند ابن طنط بيرو جارتكوا .. طنط مين يا ولد .. خلانى طنط خلاص .. مش مشكله عشان برستيجى .. ااااااااه مهند لا يا حبيبى مجاش هناوقفلت .. لقيت ماما بتقولى فى ايه ؟! حكتلها قالتلى ايه ده ده اهله سيبنه هوه واخو النونو لوحدهم فى البيت وراحوا مشوار مهم .. راح فين الواد دهوخلتنى لبست وطلعت اسأله .. لقيت الكتكوت ولا لا ؟ ولقيته يا عينى وشه جاب ميت لون .. لاااا يا طنط انا دخلت الحمام ووطلعت ملقتهوش فى البيت ؟! ازاى يعنى .. ودخلت انادى عليه وافتش فى الشقه .. ولا حس ولا خبر .. واخوه النونو صحى يا ولداه .. وطبعا شيلته مقلكوش حته لحمه حمره كده بقيت خايفه قوى .. بس قلت لا جمدى قلبك يا كوكى .. وبقيت أطبطب وأدلع .. وأناااااااادى يا مهند .. ولا حياة لمن تنادى !!وماما طلعت وجيرانا طلعوا وكلكوا ينادى .. وفتشت تحت السرير والبلكونه .. وفى كل حته إنى ألقيه .. الواد أختفى ؟!وسألت البواب والجيران والكل نزل يدور عليه .. وجارتى تقولى أنا سمعت بابا الشقة أتقفل ؟! بجد يبقى نزل المجنون .. وبعيد فى الورطه دىوحياتكوا وقفت الشارع على رجل وكلوا بقى يدور .. وكلمت أهله .. والنونو يعيط .. وأنا محتاسه .. وحسيت إنى أم العيال .. وابنى ضاع .. وااااااااااااااء .. المهم لقيت اهله جم .. وبيروا طبعا تبصلى تقولى ابنى فين يا كوكى ؟! ايه ده بقى هوه انا متهمه انى خطفته ولا ايه ؟ وانا ايه درانى يا خوانا .. وقعدت تعيط وجوزها خلاص على اخره .. واحنا واقفين .. وهيروحا الشرطه .. وفجأة سمعتلكوا صوت كده حد بيضحك من تحت لتحت .. استنوا يا جماعه اسكتوا كده شويه .. أنا سمعه صوت المحروس ابنكوا .. وفضلت ورا الصوت لقيت البيه مستخبى جوه الدولاب ..وعامل نفسه قال ايه نايم ؟! انت هنا بصلى كده وضحك ومامته جريت حضنته .. وتبوس فيه .. والحمد لله خير .. وقعدوا يطمنوا الناس .. وأنا واقفه بصراحه بغلى من جوايا وعايزة أضربهم كلهم .. روحت ماسكه الواد قلتله كنت سمعنى وانا بنادى عليك ولا لا .. الواد يضحك بعبط كده ويقولى أأأأأأأأأاااااه ااااااه انت هتفرسنى .. ومردتش ليه .. مستخبى فى الدولاب ليه يا حبيبى من قله السراير فى بيتكوا ..ده أنت طلعت عيل بصحيح .. وأنا عيله انى صدقت إنك مسكين وأتخطفت لا توهت .. وكلوا طبعا عمال يقول الحمد لله .. وقعدوا يرغوا ولا كأن شئ حصل .. وأنا نزلت شقتنا على أخرى أنا كنت نقصاك .. ده إيه حرقه الدم واللامبلاه دى .. أه بس لو كان ابنى .. وابوة وامه مش موجودين كنت عملت فيه عمايل .. اااااااااااااه يا نارى .. لا أنا لازم أعزل من العمارة الفقر دى .. وقال قعدين فى حته هاى كلاس واستايل ووكلام فارغده انا قعده فى الخانكه .. فى المرستان .. بجد جنونى .. وخلونى مش بنوته .. لا بقيت ستوته .. وقعدت اغنى كوكى حسنى .. مطربه جديده قريبا فى العباسيه .. أنا مش عايزة أتجوز كل ما أقول هتجوز تحصل حاجه ترجعنى على كل اللى انا ناويه .. كل ما اقول انا هبدأ .. أبنى حياتى وأبدأ .. تحصل مصيبه ترجعنى على انا ناويه ..على الحال ده بقالى كتير .. على الحال ده أناااااا وكتيررررررررررر .. يا خواتى خسارتى فى العمارة والبلد دى .. يا خسارتك يا كوكى بلد بتاعه شهادات بصاحيح ..


:))


ضع تعليقك

9 التعليقات:

pakinam ismail said...

put your comment please

:)))

eman abd elwahab said...

gamila awiy ya koky w bel tawfeee2 ya rb

pakinam ismail said...

مرسى ايمان واهلا بيكى نورتينى يا جميله ويارب باقى اليوميات تعجبك ان شاء الله

:)

Anonymous said...

ميروك يا كوكي
وان شاء الله مدونة ناجحة زي ماعودتينا علي النجاح و الابداع دايما
احمد العجمي

Anonymous said...

انت توهتيني من مهند لجرتكم لتركيا للنكد لللل......يا قلبي لا تحزن
واتمنا ان تجدي مهندك

Nisreen-Facebook-الدور الرابع شقة عشرة

pakinam ismail said...

شكرا ليك استاذ احمد على كلامك

ومشاركتك بالدونة ويارب تنجح اكتر ان شاء الله بمشاركتكم

pakinam ismail said...

اهلا نسرين منورانى المدونة واهلا بيكى

مرسى للمشاركة :))

اعمل ايه يعنى هيا الدنيا كلها توهان

فى توهان :))

بس يارب كل اليوميات تعجبك

:)

Anonymous said...

صباح الخيرااات
اسلوبك رائع
وباقى اليوميات جميله اوى
جووووووو اون

ابوصالح

pakinam ismail said...

صباح النور استاذ ابو صالح

بجد شكرا لحضرتك على ردك ومشاركتك

وتشجيعك ويارب باقى اليوميات

تعجبك ان شاء الله

وتكتبلى رأيك فيها

 

يــومــيــات بـــنــوتـــة Template by Ipietoon Blogger Template | Gadget Review