Wednesday, May 6, 2009

يــومــيــات بــنــوتــــة 9

مرسلة بواسطة Yomeat Banota في 7:50 PM



يــومــيــات بــنــوتـــة



(9)




الليلادى عيد ميلادى .. ويا سلاااااام طبعا كل الناس بتحب اليوم ده موووت .. ايشى هدايا على ايشى مكالمات حلوة

على اايشى رسايل احلى .. على ايشى كلمتين فى العضم انتى كبرتى وبقيتى عروسه ولسه منورانا يا قمر ..

وبدل ما ينفخوا الشموع ينفخوا فى وشى ويغنولك احلى اغانى كان يوم اسود يوم ما جيتى .. بس الصراحه ده كان السنين اللى فاتوا .. بس السنه دى محدش عايز يفتكر ان الليلادى عيد ميلادى .. بينى وبينكم انا عارفه وبعترف انه كان اسود سواد الليل .. وكان يوم احداثه جميله .. ويوم مشهور فى العالم كله .. خصوصا عند عمنا بوش ..

!!!!! االلى بيحتفل بيه سنويا .. ومازال يبحث عن صاحب التورته .. التى ادت الى هذا الانفجار الخطير ..


وصدقونى واوعوا تبلغوا عنى .. انا لسه بنوتة ونفسى اكون عروسه .. وانا مكنش قصدى دى كانت تورته بالشيكولا وطفيت الشموع وعينكم ما تشوف الا النور وحصل اللى حصل .. اعمل ايه بس حتى يوم ولادتك منحوسة يا كوكى .. خلاص خلصت كل الشهور والايام عشان يختاروا اليوم ده .. ما انا ناقصه اصلى ظلم اهئ اهئالمهم انا صحيت اليوم ده .. ولا لقيتمكالمة ولا رساله واحده ولا ماما كده عملالى سبريز مفاجأة يعنى .. ولا أى حاجه .. وبقيت طول اليوم اقول احم احم .. تخيلى يا ماما النهاردة يوم جميل قوى .. واول مرة محسش بالصيام خالص .. ولا ايه يا ماما ؟

لقيت ماما .. مطنشه ولا كأنى بتكلم .. ولا بهاتى .. ماما انتى معايا .. ايه يا كوكى خير مردتيش عليا ليه يا ماما .. مش بحكى معاكى .. ااااااه سمعت بس معرفش ليه يا بت يا كوكى انا النهاردة قمت من نومى ومش طايقه نفسى .. وجاى على بالى اغنيه كل البنات اتجوزوا وانا قعده جانبك يا ماما .. عشان رومانسيتى يا ماما وحاسه بالصيام قوى النهاردة بالذات .. وتعبانه .. وحضرتك ياريت تقومى تحضرى الفطار !!


عايزة اقولكوا كأن جردل تلج وقع على راسى .. نسانى أصلا انا قلت ايه ؟يعنى يا ماما خلاص حبكت النهاردة الكوابيس والعطش وانى ادبس واعمل الفطار كله لوحدى .. وايه الاغنيه العجيبه دى ؟! دى بتاعت مين يا ماما ؟!

بتاعت كوكى حسنى !! ممممممم ده ماما بتلقح بالكلام عليا بقى .. هوه ده الاحتفال بقى .. مامااااااا بقلك النهاردة 11 رمضان .. ايه ده بجد يا كوكى 11 رمضان . .ااااااه يا ماما وحياة صيامى 11رمضان !!

يبقى فاضل قد ايه يا كوكى على العيد كده .. عشان نشوف هنجيب خروف .. عيد ايه يا حاجه ام كوكى لما يخلص رمضان ابقى فكرى فى العيد .. وخروف ايه بس دلوقتى .. يعنى ده اللى لفت نظرك .. 11 يا مامااااا ..


عرفت ايه 11 يعنى !! خرمتى ودنى .. عادى يعنى يوم زى باقى الايام !! .. يا نهار عليا هيه ماما مش طيقانى كده ليه؟

طيب ده انا اللى عمللها حس فى البيت ده واخر عنقود سكر معقود .. والبنوتة الوحيده كمان .. يعنى مش بيفكرك بحاجه خالص يعنى ؟!! .. لا يا كوكى مش بيفكرنى غير بذكريات أليمه ؟!..


ورقم 11 ده اصلا رقم ملوش طعم .. طيب ماما حبيبتى انتى صايمه وعماله تغلطى فيا من الصبح .. فنظرت لى شذراً أنا جيت جنبك يا بنتى .. ايوة يا ماما النهاردة بلا فخر عيد ميلادى !!


ولقيت ماما زادت شذراً وقالتلى ومش مكسوفه يا كوكى وانتى بتقوليها .. طيب خبى السر الفظيع ده يا حبيبتى ومتقوليش لحد !!

رفعت حوجبينى .. وانقلب وجهى اندهاشاً . . اتكسف واخبى .. ليه هوه انا عمله عمله ولا عمله عمله يا ماما ؟!!

?! ده عيد ميلادى .. اليوم اللى طيرتى من الفرح لما اقلولك جبتى اخيراً بنوتة .. ولا هوه عينى فيه وأقول أخييييه !!


بقلك اسكتى فرحانه بأيه انك ما شاء الله لسه مقضيه عيد ميلادك هنا جانبى ؟! وعايزانى لسه اجبلك هدايا كمان !!


ايه يا ست الكل امال اقضيه فين فى الهيلتون ولا ايه ؟! ولا حضرتك عملالى يا ست الحبايب مفاجأة وعزمالى صحابى بره .. صح شكلك كده .. ربنا يخليكى ليا يا حبيبتى يا مامتى ..


اتوكسى يا كوكى ..انتى يا بنتى عايزة ترفعيلى الضغط اكتر ما هوه مرفوع .ليه يا ماما مش من حقى كمان افرح بهذا اليوم العالمى الذى ولدت فيه البنوتة الامورة اللى هوه انا طبعا كوكى ؟!!


.. اجرى اجرى حضرى الفطار احسن .. ياحسن المغرب قرب خلاص .. لا مش هعمل لا فطار ولا سحور وهخليكوا صايمين للفجر .. ويمكن طول رمضان كمان !!


عايزة افهم يعنى ايه لسه مقضيه عيد ميلادى هنا ؟! والأغنية الجميله اللى حضرتك ألفتيها حالاً دى !! يعنى المفروض كنتى تقضيه مع الموكوس فى بيتكم !! والمقصوف يجبلك الهديه ويعملك عيد ميلادك ويعزمنى كمان !!


هوه فى ايه كلكوا عليا ولا ايه ؟ هوه عم بوش سلطك عليا ولا ايه ؟ ولا طنط كوندليزا بعتتلك مسج شحنتك ضدى ولا ايه ؟

موكوس مين ومقصوف مين ؟ انا معرفش حد بالاسامى دى ؟! قصدى الاستاذ اللى مامته داعيه عليه والمفروض يجى يتجوز سعادتك !!ايه ده يا ماما كل ده حضرتك شيلاه جوه قلبك .. قد كده بقيت حمل كبير فى البيت ده !!


واللى هياخدنى يبقى حماتى الغاليه داعيه عليه .. يالهويزززز حتى انتى يا اماااهما انتى يا كوكى يا حبيبتى اللى عايشه فى الاحلام .. مفيش حاجه اسمها رومانسيهيا بنتى . . سيبك من مسلسل نوروسنوات الضياع والكلام الهابط اللى بتكتبيه ده .. وشخصيه لميس اللى انتى متقمصاها يا حبيتى طول عمرك .. وكل العرسان زى ابو بطيخه وبس هوه ده االلى متوفر فى الاسواق ..


وزيك زى باقى البنات يا كوكى .. عايزة افرح يا بنتى !! يعنى ايه مفيش ولا راجل فى ايجيبت او خارج ايجيبت مع مراعاه فروق التوقيت .. زى رومانسيه مهند ويحيى !! ولا النابولسى حتى؟ !!


اهئ اهئ .. بقى هيا الدنيا كده .. بقى هيا الناس كده .. يا خسارة فرحتى .. يامين يرجعنى تانى لدنيتى .. مش وقت دور السندريلا .. واجرى حالا اعملى الفطار .. انا صايمه .. ومش عايزة افطر عليكى .. ايه ده الحقونى انا بقيت خلاص لا اطاق ولا ايه .. ده انا لسه بنوتة . لسه معدتش السن المطلوب يعنى ؟!!
...................... كووووووووووكى ؟!!!!!!.. حاضر يا ماما حاضر ..


خلاص هعمل وهنسى عيد ميلادى .. وعندك حق انا بنوتة جيت للاسف فى الزمن الغلط .. بس مش هما زمان كانوا بيقولوا الراجل مش بس بكلمته .. الراجل لرعايته لبيته واسرته .. كانوا بيضحكوا علينا والرجاله طلعت خرسا ولا بترعى بيت ولا غيط .. وكله عايز يتجوز وخلاص عشان اهله يفرحوا بيه .. وننوس عين مامته الحيله بسلامته ..


وأين أنت يا حمادة ؟! ولسه رايحه احضر الفطار .. ولقيت الموبايل بيرن .. احم احم معايا موبايل خدوا بالكم نوكيا ضمان اى تو واحمد مش زى الحاج احمد .. مش اى حاجه يعنى .. متنسوش مش قلتلكوا انى بنوتة فول اوبشن


.قلت اكيد دى صحبتى وهتعيد عليا .. كوكى انتى فين يا بنتى ده الدنيا هنا مقلوبه عليكى؟! .. ايه يا سمسه براحه عليا طيب قولى ازايك حتى .. ومقلوبه ليه .. والله يا سمسم انا معملتش حاجه .. واخرى الساحل الشمالى .. يعنى عمرى ما شفت طنط امريكا غير فى الاحلام !!


اهئئئئ انتى اتجننتى يا كوكى .. امريكا ايه .. وعملتى ايه ؟! .. ده فى واحد قالب الدنيا عليكى .. وهيموت ويعرف مكانك .. يالهويز كل ده يا سمسم وبتقولى مقلقش هوه اكيد هوه .. هوه مين يا كوكى ؟! .. بن لادن اكيد عايز يشيلنى انا الليله .. واروح انا فى الكزوزة .. وهوه ياكل الجاتوة ..


والله بريئه يا ناس .. اين انت يا كوفى عنان .. مش بيقولوا بتحمى الانسان .. تعالى بس قرب اقولك كلمتين .. قلبى هيضيع فى ثانيتين .. وهووووووو .. بت يا كوكى مش وقته مقالبك وتمثلياتك الحلوة دى .. اللى بيدور عليكى ده يبقى .. تيتتتتتت .. هعمل الفطار .. وهحاول احتفل بعيد ميلادى ولو لوحدى.. مش مشكله انا بقى فرحانه بشبابى !!واقولكم مين الى بيبحث عنى ؟!.. لو لسه ليا عمر جديد .. ادعولى


:)))






ضع تعليقك

8 التعليقات:

Yomeat Banota said...

put your comment please ?

:))

ابوصالح said...

يامفرقين الشموع كوكى نصيبها فين!!
حلو اليوم دا وسريع
شذرا يعنى ايه بقى
وشكراااا

Yomeat Banota said...

مرسى استاذ ابو صالح لمشاركتك ورايك

وان شاء الله باقى اليوميات تعجبك

هيا بالمعنى اللغه العربيه ليها اكتر من معنى

بس بالمعنى اللى هنا باليوميه

بتنظر لى بحده او نظرة خبيثه كده انها مش مطمنه لكلامى يعنى

وفقا للموقف اللى انا فيه مش اكتر

وشكرا مرة تانيه

eman abd elwahab said...

gamilaa ya koky bass meen 2ly bidawar 3alikyyyyyyy

Yomeat Banota said...

مرسى ايماااااااان ونورتينى


انتظرى قريبا وانا هقلك مين اللى بيدور عليا بس انتى تابعينى دايما

:))

د. إيمان مكاوي.. أم البنين said...

يوميانك جميله
منتظره باقي اليوميات

Yomeat Banota said...

اهلا بحضرتك دكتورة ايمان

مرسى لمشاركتك الجميله

اول مرة اشوف كومنت لحضرتك وان حضرتك متابعه اليوميات

بس مرسى ليكى وان شاء الله

انزل باقى اليوميات قريبا


:)

hamada said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

 

يــومــيــات بـــنــوتـــة Template by Ipietoon Blogger Template | Gadget Review