Thursday, May 21, 2009

يــومــيــات بــنــوتـــة 10

مرسلة بواسطة Yomeat Banota في 8:01 PM
يــومــيــات بــنــوتـــة
(10)
رجعتلكوا تانى وطبعا منوراكو كالعادة متحلفوش انا مصدقاكوا يا جماعه والجواب باين من عنوانه !!
هكملكوا اللى حصل معايا وانا بحضر الفطار .. طبعا ماما حبيبتى زى ما انتوا عارفين طبعا بترفض كل العرسان عشان متقدرش تستغنى عنى ودايما تقول كوكى دى فاكهه البيت .. حد عنده اعتراض او حاجه .. استنوا ست الحبايب بتنادى عليا !!


كوكى المغرب قرب خلصى الفطار يلا .. حاااااضر .. دخلت الكتشن مجبره وليس بمخيره وده الطبيعى طبعا .. وقعدت أعمل الأكل .. وأغنى عيد ميلاد جرحى أنا .. وأأأأه يا زمن .. وأنا إللى جبت ده كله لنفسى .. اهئ اهئ ..


بس بينى وبينكم الاكل طلع فوق الممتاز .. قلت عشان يعرفوا قمتى فى البيت ده .. وانجزته بسرعه عشان اكلم سمسمه وأعرف مين اللى بيدور عليا ده !!وأول ما خلصت الفطار طيران مسكت التليفون .. وكلمت البت سمسمه .. وأنا أرتجف .. ألو سمسمه .. أيوة يا كوكى .. إزايك ياقمر .. مش وقت سلامات يا قطه انا زى الفل .. يلا قولى إيه الحكاية .. مفيش يا كوكى .. ده عريس يا بنتى .. عريس !!


إنتى جيبالى عريس يا سمسمه .. مكنتش اعرف انك بتحبينى لدرجه انك تتبرعى بعريس .. الصراحه لا هوه اللى طلبك بالأسم !! .. الرقه والدهشه أخدتنى ..إحم إحم .. طليبنى أنا بالأسم .. متأكده ؟

أيوة هوه قال عايز يتجوز كوكى !! يا حلولى وكمان عارف لقب العيله .. يبقى أنا .. ولو تشابهه أسماء .. بالذوق بالعافيه .. بالديمقراطيه .. بالديمقراطيه .. هكون أناااااااا .. ويبقى دى هديه عيد ميلادى يا حلولى ..


بصى يا كوكى أنا معرفوش .. بس كل إللى أعرف إنه قالب الدنيا عليكى .. بقاله شهور .. وكان محرج جدا . وإنه غالباً كان معاكى فى المدرسة .. ولا فى درس ايام ثانوى .. حاجه كده يعنى !! نعم نعم سمسمه الصيام مأثر ولا إيه .. أنتى مفطرتيش يا قطه ؟! مدرسة إيه .. صباح الخير . أنا الولاد فى مدرستى .. كنا بنزحلقهم نهائى من المدرسة بعد خامسة إبتدائى .. إيه ده هيكون لسه فاكرنى من ساعتها ؟!


هوه أنا طبعا متنسيش نهائى وده أساسى . بس ليه فضل كاتم حبه ده طول السنين دى !!


ده كده حب هيكون طبق على مراوحه يا اختى .. طيب وايه كمان يا سمسمه ..ويا ستى هوه مهندس معمارى .. وساكن معانا فى المنطقه .. يعنى عارفك .. وعارف شكلك وعايزك أنتى وبس .. ومبروك مقدماً .. أختكوا بقى ماسكه السماعه وعايزة تنام على الكلام الجميل ده .. يا سلام الواد طلع شاطر وبقى بشمهندس قد الدنيا .. وفى سنى .. وعايزنى أنا بالتحديد .. لو بس أعرف أزغرد .. هاه يا كوكى نديله رقم التليفون عشان عايز يكلمكوا فى البيت ؟!


طبعا يا سمسمه حالا بالا تكلميه وتديله البيت .. لا أديله كمان كل أرقام العيله .. خصوصا موبايل مامى .. ووصيه يقولها إنه داخ وتعب ولف وراح وجه .. عشان يوصلى .. وانه بيحبنى منذ ان تفتحت عيناه .. عشان بس يعرفوا .. إن الحبايب كتير .. بس النفس مش أكتر!!


هههههه .. سكر يا كوكى كالعادة .. بس إيه عايزة أقولك على حاجه كده فى الموضوع ده !! اتنهدت كده وقلتلها خير يا قمر ؟! أنا سمعت إنه متشدد حبتين كده يعنى إيه متشدد ؟! متدين يعنى ؟! ما ده المطلوب .. ما إنتى عارفانى مليش فى الفانكى والبانكى .. والسبايكى .. وتوتو ولولو .. وكووول يا مان .. لااااااا مش قصدى متدين أه بس .. بس متشدد كده .. وليه طلبات معينه ؟! أن أن أاااااه دى موسيقى تصويريه متستغربوش !! طلبات إيه يا سمسمه سمسمه .. نعم يا كوكى .. ادعى عليكى بأيه بس .. هوه أنا كنت ناقصه .. مقلتيش الكوبليه ده الأول ليه .. قبل ما تغنى عليا الأول ؟!


يا كوكى متخفيش أنا مقلتش حاجه وحشه .. إنتى لازم تشوفيه وتعرفى دماغه إيه ؟! وإنتى تقررى !! بس معرفش قلقتينى منه كده ؟! عموما أنا هقول لماما .. لو وافقت إنه ياخد التليفون .. هرنلك على موبايلك . أوك .. ماشى يا كوكى ومبروك مقدماً يا عم !! وقفلت السماعة .. وأنا إيه بقى مزقططه .. ولولا الملامه كنت زغرطت وسقفت وعملت فرح كمان .. تعويضا عن الكلام الجميل إللى ماما قالته ليا .. كوكى .. هيه سمعتنى ولا إيه ؟! سمسمه كانت عايزاكى ضرورى ليه خير فى حاجه ؟! أينعم يا ماما .. ده خير وخير قوى كمان .. بنتك بجلاله قدرها .. فى واحد بيبحث عنها .. وكان هيتجن ويعرف رقمنا .. وعايز يتجوزنى كمان يا ماما !! بت يا كوكى .. إيه الدلع ده .. تعالى هنا إعترفى مين ده ؟


وتعرفيه منين ؟! وإرتبطى بيه إمتى ؟! وأسمه إيه ؟! يالهويززز هيه ماما قلبت وكيل نيابه كده ليه ؟!


والله برئ يا بيه برئ .. معرفوش يا ماما .. إصبرى بس وأنا هشرحلك الحكاية المهم شرحتلها . . وماما بردوا مازال الماوس .. يلعب فى عقلها .. ومازالت نظرات الشذر .. تنتشر . . وتتوغل !! قلتلها عجايب .. يعنى قاعده معاكو مش عاجب .. حد جالى وطلع عرفنى .. يعنى مش هيسأل طولى ووزنى وعدد ضوافرى كام .. وأسنانى صف واحد ولا صفين ؟! مش عاجب .. أعمل أيه بس .. فى نفسى ؟!!


إهئ إهئ خلاص يا كوكى .. أنا بس مستغربه .. مدرسة إيه .. ولا درس إيه .. ده حد فاكرك وعارفك من سنين طويله بقى .. مش بقلك يا ماما معانا فى المنطقه .. وإصحى يا منطقه وأسمع الندا .. أنابيب .. بيب .. بيب .. بس يا كوكى ..


إتجننتى .. طيب رنى لسمسمه خليها تديله الرقم .. لما أشوف الحكاية ؟! روحت ماسكه الموبايل .. وإيه رنات للصبح .. لا روحت مكلمها سمسمه اديله الرقم وبخرى الرقم قبل ما تديهولوااااااااااااااا .. ولقيت سمسه كلمتنى قالتلى هوه خد الرقم .. وهيكلم مامتك .. بس هيكون كده من خمسه لـخمسه ونص كده .. لانه بيرجع من الشغل متأخر ؟


فيها حاجه ؟! لاااااا مفيهاش ولو عايز يجى ويفطر معانا .. مفيش إنى بروبلم .. هههههه إيه يا كوكى مالك بقيتى مستعجله ليه ؟! مش إنتى كوكى إللى أعرفها ؟! بيبنى وبينك يا سمسم أنا لا مستعجله ولا حاجه أنا بس الفضول إنى أعرف هوه مين ده .. إللى شغلنى .. لكن الست ماما يا ستى هيه إللى عايزة تفرح بيا وبس .. وبتقول عقلى ورومانسيتى هتودينى خلف الأسوار .. لا يا بنت يا كوكى انتى عقلك بيعجبنى ويوزن بلد .. قوللها يا اختى وحياتى !!


خلصت المكالمه .. وأنا عقلى عمال يجيب ويودى .. ياترى مين ده .. طيب شكله إيه .. طب حتى إسمه .. ده من المفاجأة نسيت أعرف إسمه ؟! طيب هرتاح وأوافق ولا زى العادة .. يطلع مش ده فارس الأحلام !! لا أنا كده عقلى هيشت .. بصراحه بقى أول مرة أنام بدرى .. عشان الليله دى تعدى .. عشان معادنا بكرة الساعه خامسه.. معادنا بكره الساعه خامسه !! يا سلام يا بنت يا كوكى ولا ليلى مراد فى زمانها !!


وصحيت من الفجر بقى وإيه كلى همه ونشاط .. ورتبت البيت .. وكل شويه أرفع السماعه .. أشوف الحرارة يحسن حرارتى جابت أخرها .. ومسكت عصاية المقشة بأيديا الأتنين وقعدت أغنى من خمسة لخمسة ونص وأنا واقف بستناك .. يا حبيبى يا حبيبى .. كووووكى .. بسم الله الرحمن الرحيم .. خضتينى يا ماما .. مش زى خضتى عليكى .. يا بنتى .. إنتى بترقصى زى شكوكو بعاصيه المقشه .. كده ليه ؟!


وحبيبك مين إللى من خمسه ونص مستنياه ؟! لا يا ماما من خمسة لخمسة ونص .. لا برافوا عليكى يا بينتى .. ده الكلام الهابط ده جبتيه منين ؟! دى غنوة عظيمه لشخص مجهول الهويه .. على طول ابن البواب مشغلها .. فلزقت فى دماغى منه لله ؟! انتى عارفه انى مليش فى الاغانى دى خالص .. بس إيه رأيك فى بنتك شكوكو والمهارات الحلوة دى .. يالهويز قصدى بنتك كوكى يا سلام ده أنا فرحت بيكى فرحه الدنيا .. إيه ده شكوكو مين .. ده إنتى ولا أجدع واحده فى فرقه رضا .. ورينى كده العصايه .. وورينى عملتى الحركات اللولبيه دى إزاى .. وأنا بحسن نيا .. وثقه فى أمى .. أتفضلى يا ماما .. راحت شداها وزربوا على رأسى .. يالهويزززز .. إيه يا ماما ؟!


عايزة أرجعلك عقلك يا بنتى .. خلاص عقلك اتلحس للدرجه دى .. مستعجله على إيه .. أنا واثقه إنك هترفضيه زى كل مره .. لااا يا ماما أوعدك إنى أوافق .. بصى يا ست الكل .. طالما هوه إختارنى .. يبقى راجل عنده ذوق عالى جدا .. وعقل حكيم .. وطالما إنه لف وتعب لغايه ما عرف رقمنا .. يبقى بيقدر وبيفهم صح ..عشان كده أنا موافقه مقدما ..


يا سلام يا سلام .. طيب إيه رأيك إنى شايفه طالما أختار حضرتك .. يبقى أكيد عقله مش فى راسه .. ومحتاج يتعالج كمان .. ولا يمكن مامته دعايه عليه فى الشهر الكريم ده .. ولا يمكن عايز يكفر عن ذنوبه .. ولاااا ايه ؟!


يالهويز كفاية يا ماماااا .. عندى بس إستفسار ؟! حضرتك متأكده إنى بنتك ؟! للاسف أه وأخر صبرى كمان .. ممم طيب طالما شايفه إنى كده .. ليه بقى عايزة تجوزينى مش حرام نظلم ولاد الناس ؟! لا يا كوكى مش حرام .. هوه أنا هضرب حد على إيده ؟!


هههههه حضرتك بتضحكى على إيه ؟! .. عليكى .. بتبقى زى القمر وأنتى مستفزة كده ؟! بحب أنغشك يا عبيطه .. يا سلام بقى كده يعنى حضرتك قصده عشان بكون زى القمر .. طيب عشان خاطرى متنسيش شويه استفزاز قبل كل مقابله مع ابن الحلال عشان أكون قمر !!


يا بت يا كوكى ده إنتى أخر العنقود سكر معقود وبنوتى الوحيده .. دأنتى تستهلى أحسن واحد فى العالم .. كفايه رومانسيتك وقلبك الأبيض .. أيون كده يا ماما .. كده إتأكدت إنك مامتى حبيبتى !!وخدتنى فى حضنها .. يا سلام يا ولاد .. مفيش أحلى من حضن الأم !! وأنا غارقة فى لحظه الحنان الجميلة دى . . لقيت التليفون بيرن .. مامااااااا.. إيه يا كوكى .. التليفون .. طيب ردى يا بنتى .. طيب يا ماما فاصل ونواصل مع المشاعر الحلوة دى .. طيب ما حضرتك اللى تردى . لا يا كوكى أنا عايزاكى إنتى إاللى تردى .. عشان أعرف إيه أخره الحكاية دى .. مممم .. ماما خدوا بالكوا بترسم خطه شريرة .. بس ولا يهمنى .. أناااااا بريئه .. ورفعت السماعة .. وأنا قلبى بقى قنبلة .. لا ده بقى زى مدفع الأفطار .. وهينطلق .. ألووو .. أيوة .. بيت الأنسة كوكى .. يا حلاوة . البيت بقى بأسمى .. وأيه الأحترام ده ..


أأأه هوه .. متهيألى إنك كوكى .. لا إيه ده .. وعرفنى كمان من أول ألوو .. لسه حافظ صوتى كمان .. لا ده هوافق يعنى هوافق .. وبأدبى المعروف المشهور قلتله أه أنا .. أستعبطت بقى .. وقلتله مين معايا .. قالى .. أنا ...... مش فكرانى ؟! بيبنى وبينكم أول مرة أسمع الأسم ده .. بس على مين .. هعصر دماغى وهفتكر يعنى هفتكر .. الصراحه مش فاكرة قوى الأسم .. قالى أنا كنت معاكى فى درس الألمانى .. والانجليش فى أولى وتانية ثانوى ممم أيه الحلاوة دى إيه الطعامه دى .. سنتين بحالهم معايا .. بس إيه ده .. ده من حوالى 8 سنين تقريبا ؟! بس كويس إنه لسه فاكرنى ؟!


الصراحة مش فاكرة .. ما كان فى الدرس ناس كتير جداااا .. وأنا مكنش ليا علاقه غير بصحباتى وبس !! سكت كده شويه .. قلت يا خرابى أنا عكيت ولا إيه .. بس صدقنى هحاول أفتكر .. ويمكن لما أشوفك .. راح قايلى ..طيب مش فاكرة كان فى واحد كده .. بيمشى وراكى بعد كل درس ؟! بعيد عنكم وشى جاب ألوان الطيف كلها .. ورجلى خبطت فى بعضها .. وماما واقفه تنظر لى شذراً بردوا .. وأنا من جوايا عايزة أقوله .. أنا كان بيمشى ورايا كتير ..


أنت مين فيهم ؟! .. مش بيقولوا بردوا التقل صنعه .. ولاز يعرف ان معجبينى كتير هوه انا شوية فى البلد دى ولا شوية .. روحت غيظاه أكتر .. قلتله مين ده إاللى كان بيمشى ورايا .. ضحك قوى وقالى أنا يا كوكى .. حطيت إيدى على بوقى .. لانى إنكسفت وكنت عايزة أكركر بصراحة .. إيه الهنا إاللى أنا فيه ده .. هدوتينى فى داهيه .. وهتودى نفسك فى داهيه لو ماما سمعت كلامك ده أو حد من أخواتى .. فسكت كده .. قالى عموما يا كوكى لما تشوفينى .. إن شاء الله تفتكرينى .. ممكن ماما تكلم مامتك ؟!


أخيرااا قلتها .. كان من بدرى .. منكرش إنى دوخت من الكوبليه الحلو ده .. بس فى عصايه مقشه لسه فيها نفس وممكن تنكسر على نفوخى .. بسبب سعادتك !! وإديت لماما السماعه .. وقعدوا يدردشوا ..وأنا بقى هيمانه وسرحانة .. وعماله أفتكر ملقتش غير درس الأنجليش والألمانى .. ده كان سينتر كبير .. وفيه مصر كلها !! بس كويس يعنى هيعرف يقول أى لاف يو .. وايش لبا ديش .. ههههههههههه وكده نحب بعض بجميع اللغات


ماما قفلت السماعه وقالتلى .. هنتقابل بكرة أن شاء الله .. بس تعاليلى يا حلوة .. وقوليلى كنت مغمى عليكى فى السماعه كده ليه ؟! وطلع مين المحروس ده ؟! بدل ما أرجعك شكوكو تانى !!


وحياة الحضن اللى كان بينى وبينك من ثوانى معرفوش .. طيب من النهارة لأخر الشهر هتعملى كل الفطار لوحدك والسحور كمان !! يالهويززز أنا عملت إيه بس يا ماما .. مش لسه كنت بتشكرى فيا وقولتى أخرعنقود سكر معقود!!ومفيش منك يا حبيبتى .. رجعت فى كلامى ومش قلتى إنك موافقه على المحروس مقدما .. خلاص مبروك عليكى المحروس .. أيون موافقه كفاية إنه كان بيمشى ورايا بعد كل درس عشان يطمن عليا لما أوصل البيت .. يعنى راجل شرقى بجد وبيعرف يحمى بنت بلده .. نعم نعم قلتى إيه ؟يا نهارى على لسانك يا كوكى .. مقلتش حاجه يا ماما .. بخطرف فى الكلام .. مشى وراكى يعنى عرفاه .. تعالى هنا .. معلش ألحق أجرى وأجيلكوا ..وأودع المقشه لانها هتنكسر .. هتنكسر .. !!


الحقونى أو ادعولى
:)))


ضع تعليقك

11 التعليقات:

Yomeat Banota said...

put your comment please ?!

eman abd elwahab said...

gamila ya koky bass men 2ly kan bimshy waraky da w ba3deebn ya koky da shakloh himan feeeky 7'alss

Yomeat Banota said...

اهلا ايمان اولا مرسى لمشاركتك ومتابعتك

ثانيا مرسى انها عجبتك يا جميله

ثالثا ده سر كبير هتعرفيه قريب ان

شاء الله مع الهيمان زى ما قولتى :)))

تحياتى

ابوصالح said...

صباح الخيراااااات
يوم جميل وتحسى ان فيه اكشن
بس فى الغالب لما تنتظرى تليفون بيجى ارقام غلط كتير
عموما لو عماره ما نفع فيه اتصالات متوفر
هههههههه
بجد اسلوب حلو فى سرد الاحداث
تسلم ايدك

Yomeat Banota said...

صباح النور يا استاذ ابو صالح

وشكرا لمشاركه حضرتك الدائمة ورايك فى أسلوبى

ويارب اليوميات القادمة تعجب حضرتك

lolaaa said...

بجد عسولة خالص وتحفة قوى دمك خفيف

Yomeat Banota said...

مرسى كتير لولا ونورتى يا جميله

ويارب تتابعينى دائما واعرف رايك دايما ومرسى لذوقك ووجودك

:)

zoka said...

فين باقى القصة اتكسرت المقشو وبس ولا ايه مفيش خطوبة انا عايزه اولولولولولولولى ازغرط الله

Yomeat Banota said...

:))

مرسى زوكا منورانى بس عايزة بس عشان تعرفى المقشه انكسرت ولا لا ماسى ماشى

:)

حاضر انا علقتكوا كتير عارفه بس هنزل اليوميه 11 ناو واتمنى تعجبك

:)

Anonymous said...

حلوة قوي كوميدية جدا ملهاش حل
استمري واحنا معاكي لغاية بيت العدل ان شاء الله :)))

walaa mohamed.M.N said...

جميييييييييييييييلة
أسلوبك حلو أوووووى يا باكى

 

يــومــيــات بـــنــوتـــة Template by Ipietoon Blogger Template | Gadget Review