Monday, January 19, 2009

يــومــيــات بــنــوتـــــــة 6

مرسلة بواسطة pakinam ismail في 5:37 PM
يـــومــــيــات بـــنــوتـــة
(6)

انا جيت اهه تانى خلصت المواعين وايدى باشت والحمد لله بس مش عارفه كل دى مواعين ولا بغسل مواعين الجيران
والشارع ومواعين الفيس بوك بالمرة كمان يعنى !!! بصراحه مكنتش اعرف ان عندنا حلل كتير كده ؟! المهم بقى كنا بنم على ايه ؟! ولا بنقول ايه ؟! اه افتكرت كنا بنكلم على العريس !! يا كسوفى يا ناس يا كسوفى .لما اقولكم بقى المفاجأة لقيت ماما بتقولى العريس بيشتغل ظابط !! طويل العمر يطول عمره وينصره على مين يعديه هاى هى !! لا ومش ا ظابط ده ظابط فى المطار .. لولولىىى يعنى هنسافر بقى كتير يا ماما ونلف العالم ويكون كده زى عمر الشريف فى فيلم اسمه ايه ده ؟! يوه مش فاكره اسم الفيلم دلوقتى بس هيكون قمر كده والنجوم منوره على كتفه .. لقيت ماما بتقولى بس يا حبيبتى انتى خلاص اتجننتى بقلك ظابط فى المطار مش طيار !! عمر الشريف مين وتسافرى فين !! بينى وبينكم اتحرجت قوى واحمرت خدودى كده وقلت صحيح ده فى فرق بين الظابط والطيار !! الظابط بيكون على الأرض والطيار فى السما!! هههههههههه مش عارفه هيه الحاله بقى اشتغلت معايا من الفرحه .. عريس يا بووووووى قالتلى اه بس سنه 33 سنه وماشى فى 34 سنه !ايه كام ليه انا لسه تامه 24 سنه لسه صغنونه 11 ولا 12 سنه فرق ليه يعنى ؟! وهانديله اقوله يا ابيه بدل يا حبيبى !! وظابط كمان يعنى الظبط والربط ويعملى محضر بقى لو أتأخرت عليه فى الاكل ولا اى حاجه .. ويمكن يحبسنى حبس انفرادى فى المنزل .. واستنى الناس تجيى بالعيش والحلاوة .. ايد ده يا كوكى خلاص قلبتى الموضوع من جوازه لبرنامج خلف الأسوار .. وجعلونى مجرماً !! لا يا مامااااااااااا لااااااا مش عايزاه وخدى دبلته اديهاله .. اهئ اهئ لا حول ولا قوة الا بالله انتى اتجننى يا كوكى ولا ايه .. اتكلمى جد شويه .. موافقه تشوفيه ولا لا؟ لاااااااا سنه كبير وظابط لا يا ماما هصبر شويه مفيش مشكله .قالتلى انتى حره .. اه أنا امرآه حره مستقله بس كده .. جه بقى تانى يوم لقيت التليفون رن وماما راحت رده عليه .. ولقيتها بتقلها لا والله ده زى ابنى وهشوفله بنت كده تكون بنت حلال .. بس السن بس كوكى خايف منه وكده .. والله قلتلها وهيه مش راضيه .. ههههههه طيب لحظه واحده .. يا كوكى يا كوكى .. تعالى كلمى طنط ؟! طنط مين ايه الاحراج ده بقى وقعدت اشاور لماما واقولها بلاش .. راحت شده على سنانها وقالتلى تعالى كلمى بسرعه .. رحت جريت رهوان .. ياحسن الواحد مش ناقص خناقات مع ست الكل .. ياحسن تجوزنى بالعافيه للظابط !! ومسكت السماعه وبرقه بقى قلت الو .. اه ازاى حضرتك .. لا ابدا ازاى انا طبعا أحب اشوف حضرتك .. لا بس انا بحب فرق السن يكون 5 او 7 سنين مش اكتر من كده بصراحه !! هيه دى كل الحكاية يا طنط !! ايه الاحراج ده بقى !! طيب ثوانى ماما مع حضرتك .. انا بصراحه وزوغت من تكمله المكالمه المحرجه دى .. ولقيت ماما بتضحك وتقلها ربنا يخليكى هيه كوكى بس رقيقه وبتكسف شويه .. يا كوكى تعالى كلمى طنط تانى .. يووه هوه فى ايه مقلت مش موافقه هوه الجواز بالعافيه يا ناس ولا ايه ؟! ومسكت السماعه وانا مخنوقه بصراحه وعلى اخرى .. وبقول الووو .. لقيت الصوت اخشن كده مره واحده .. الله هيه طنط شرقت ولا ايه .. صوتها ماله كده !! لقيت اللى بيقولى ازايك يا كوكى عامله ايه ؟! قلتله الحمد لله .. قالى ايه سمعت انك تقلانه علينا ومش عايزة تشوفينا وبتقولى ان سنى كبير عليكى ؟! يا لهووووى روحت فى داهيه .. ده الباشا بنفسه بيكلمنى .. ايه هيعتقلنى عشان رفضت ساعته ولا ايه ؟! قلتله لا ابداً .. قالى طيب امال ايه عايزيين نتقابل كده ونتعرف على بعض .. وانا لا كبير ولا حاجه .. طيب مش انتى بتسمعى عمرو دياب وحماقى ؟!ايه السؤال الغريب ده ليه اللى بيسمعهم بيتقبض عليهم ولا ايه ؟!! لا يا فندم بسمع شعبولا بس أنا بكره إسرائيل وااييييييييييييييييييييه قلتله اه بسمعهم ليه ؟! قالى طيب ما انا بسمعهم شفتى أنا صغير إزاى ؟! يا مرارى بقى السؤال ده عشان الأجابه دى ؟!! يا صغنن لا يا واد اقنعتنى بصراحه .. ايه ده ده انت أصغر منى كمان والله .. راح قايلى انتى بقى طويله ولا قصيرة ؟! رشيقه وشعرك ناعم ولا خشن ..هههههههه وضحك كده وقالى أصلى بصراحه بحب الشعر الناعم والبنت الحلوة ..ايه ده ظابط ايقاع ده ولا ايه ؟! سم كده ده دمه يلطش .. وانا مش ناقصه مراره قلت والله لا اوريله كوكى بقى هترد ازاى ؟! قلتله متهيألى ده مش الأساس فى الجواز .. ضحك وقالى صلى بصراحه انا مش بحب الشعر الخشن خالص !! يا سلام امال الجاز راح فين ده هيه ازازه جاز وعود كبريت والشعر يبقى تمام التمام !! فقالى هاه انتى بقى مواصفاتك ايه ؟! قلتله انا مبعرفش اوصف نفسى كده وبعدين مش لما أشوفك أنا كمان .. شعرك ايه .. وطويل ولا قصير .. رشيق ولا بكرش ..خصوصا الكرش .. كفايه اترعبت منه فى الحلم .. راح قايلى لااااا أنا راجل .. يااااااااااااا سلام .. راجل .. يعنى إيه ؟! مش من حقى أنا كمان أبص القى وش بشوش كده ورشاقه وشياكه ووجه جميل كده اتصبح بيه على الصبح .. ولا يبقى معايا طول اليوم نشادر عشان كل ما ابص فى وشه ويغمى عليا .. ألحق نفسى بالنشادر على طووول !! ده ايه التفكير العجيب ده .. خلاص من حقه يطلب ويتأمر .. وانا مليش نفس ولا مليش نفس .. ماما فضلت تبصلى قوى .. روحت قلتله ماما معاك .وبقيت من جوايا بغلى .. حرق دمى البعيد .. ايه جاى يشترى عروسه المولد ؟! وقفلت ماما مع الباشا .. ولقتها بتقولى ايه اللى انتى قولتيه ده ؟! قلتلها قلت ايه ؟! يعنى ايه يسالنى شعرك طولك ..معرفش ايه .. يا سلام وانا مش من حقى كمان اتخيل فارس احلامى .. زى ما هوه عايز سندريلا احلامه .. وانا كده متأكده من قرارى بالرفض .. لانه بالمكالمه دى جه يكحلها .. عماها !!ومفيش ثوانى ولقيت التليفون رن .. قلت ربنا يستر .. خلاص احنا اعتقلنا خلاص والمكالمه استجلت تقريبا .. ربنا يستر !!لقيت ماما وشها جاب الوان الطيف وبتقلها لا اتفضلى طبعا .. حضرتك تنورينا .. وانا مستنياكى .. مع السلامة ؟! كوكى البسى طنط مصممه تيجى وكسفتنى ولقيتها بتقولى نص ساعه ونقابلكم فى النادى .. قلتلها أشوفه ازاى ؟! انا مش طيقاه .. كفايه مرارة اتفقعت فى التليفون هقابله كمان .. هيجبلى ايه ؟! الهس هس ؟!! محدش يسألنى ايه الهس هس ده ؟! وقلتلها أنا مش رايحه .. قالتلى يعنى إيه هتحرجينى .. خلاص هنقعد معاهم شويه وخلاص ؟! اتفضلى ألبسى عشان الوقت .. ويارب يكون من نصيبك عشان تعرفى ان الله حق .. وهوه بقى هيمشيكى على عجين .. وقعدت تضحك وتخوفنى .. يا سلام ظابط ظابط .. ما أنا محاميه قد الدنيا .. وهعرف أخد حقى ..أوف بقى أيه التدبيسه دى . !!.رحت لابسه طقم بنى فى بنى .. كتكيتوا بنى بقى .. وضربت البوظ من أولها ونزلت انا وماما ورحت النادى .. ولقينا الباشا ومامته وصلوا .. وكان نازل من حته عربيه .. كانت أحلى ما فى الموضوع بصراحه .. ولقيت حاجه طويله كده وعريضه نزلت من العربيه .. قلت مين ده ؟! سليمان الناجى اسماله عليه اسماله عليه ؟!وعليه ابتسامه .. يا ساتر تحسى إنك عايزة تاكلى مخلل بعدها على طول !! المهم قعدنا ولقيته بيفلينى قوى .. روحت قلت والله لاعمل زيه بس كده عند بعند وشغل أطفال بقى !! وفضل يقولى ايه ده طلعتى مش طويله قوى .. قلتله انا مش طويله .. انت اللى طولك مش طبيعى .. وبقيت أبص ورايا .. ليكون معاه مخبرين ويجوا يشدونا على القسم ولا حاجه .. فقلت أمسك لسانى شويه .. بس هوه مستفز قوى .. ولقيت مامته بتقولى .. ايه رأيك فى القمر بتاعنا بقى ؟! على فكره ده شعره كان تقيل وسايح قوى بس طبعا طار شويه من الكاب بتاع الشغل ؟! هههههههه قمر ايه يا حاجه ؟! وشعر مين اللى كان سايح ؟! أنتى هتشككينى فى نظرى ولا إيه ؟!أتاريه متعقد وعايز بقى واحده شعرها ناعم !! قلتيلى .. المهم قعد يرغى كده فى كلام مش مفهوم وكل كلمه يقولها يضحك عليها هوه .. وانا رجلى عايزة احطها على التربيزة وأقلب القعده المسخه دى .. وابات فى التخشيبه أرحم من القعده مع الظريف ده !! ولقيته بيقولى مش هتعزمينى على حاجه ولا ايه .. ده احنا فى النادى بتاعكوا بردوا !! كمان هعزمك أنا ؟! عنيا أتنين كوكتيل سم للباشا !!راح نادى المتر وقالى تشربى ايه ؟! قلتله نسكافيه .. يمكن يظبط نفخوى شويه .. قاله وانا شاى .. لقيته يقولى لا شاطرة بتطلبى الحاجات الغاليه ؟!ايه ده .. حد موصيه عليا ولا ايه ..هوه انا ناقصه .. وثوانى ولقيت الموبايل بتاعه بيرن .. قلت الحم دلله شكلهم عايزينه .. ايوه كده حد ينقذنى من الهم اللى أنا شيفاه ده .. راح قافل على طول ورسم نفسه وعمل فيها .. المشغول بيه .. وقال لازم يمشى حالا عشان الشغل عايزة ونبقى نقعد مرة تانيه ؟! مره تانيه ايه يا كتكوت انت .. لا تانيه ولا تالته .. انت بتحلم يا حلمى .. ضحكت ضحكه صفره كده قلتله طبعا طبعا .. راحوا ماشيين .. وماما فضلت تضحك ..يا سلام يا ماما مبسوطه قوى من المقلب ده .. ايه ده .. ده ظابط ده ؟! و33 سنه ولا 33 يوم ؟! روحت واخده ماما قلتلها يلا يحسن الضغط خلاص جاب اخره وصفر كمان .. ورجعنا البيت .. وماما راحت فاتحه التلفزيون قالتلى يووه المسلسل بدأ !! قلتلها اه افتحى خلى الواحد يظبط ضغطه .. لما الباشا ده قمر امال الواد مهند ده ايه ؟ قلتلها ماما اتصلى بطنط دى وانصحيها تشوف المسلسل عشان تعرف الفرق بين القمر والغراب ؟
:)))


ضع تعليقك

20 التعليقات:

pakinam ismail said...

PLEASE PUT YOUR COMMENT

:)))

Unknown said...

ربنا ييسرلك ويكتبلك الخير وينقذك من الي مش طايقاه ده
ظابط ايه وبتاع ايه
خليكي في حاجة أحسن
ربنا يوفقك ويرزقكبابن الحلال
مودتي

pakinam ismail said...

مرسى على الدعوات الجميله دى

والمشاركة طبعا ويارب كل اليوميات

تعجبك

Anonymous said...

يومياتك جميله اوى

ربنا يكرمك بواحد احسن من الظابط دا

maroo said...

ana awel aktblk bas bagd aslobk gamd awy fe el kat2ba wa el yomyt dy bgd yomeat kol el bant wa bgd gamila awy wa isa hakon motb3a da2ma llayomeat wa anty tasthaly 3aris a7san men el zabt da milliom mara :)

pakinam ismail said...

مرسى كتير لكلامكو الجميل ويارب متكنش اخر مرة تتابعوا فيها الوميات وانتظروا المزيد
:)

Anonymous said...

هههههههه هههههه بجد اسلوب اكتر من رائع لدرجه انك شدتيني اني افكر اتب يوميات جيولوجي

عاشق الحوريات said...

ربنا يكرمك.. ويرزقك بواحد ان شاء الله يتقى الله فيكى ... بس سؤال هى الحاجت فعلا حصلت ولا دى من خيالك ... ....

pakinam ismail said...

مرسى جيولوجي

للمشاركة والكومنت ويارب باقى اليومات تعجبك وبانتظار المشاركة مرة تانيه

pakinam ismail said...

مرسى عاشق الحوريات لكومنتك ودعواتك امين يارب العالمين

لا ده سر المهنى بقى المهم انها عجبتكوا

eman abd elwahab said...

yawmeeeyat banooota gamilaa awiy ya koky w blash el beeeh da da ygeeeb el da3't

pakinam ismail said...

ايمان مرسى يا جميله لمشاركتك

الجميله ونصيحتك من عنيا حاضر

:)

Unknown said...

bgd enty 2slobek ra2e3 ef el ktaba
ana a3taked kaman kam shahr 7nsma3 en el ktab 3amal enklaaaaaaaab fe el aswa2 el masrya :))

Anonymous said...

جمييييييييييل أوي ياكوكي

حسك فكاهي جداً

ربنا يوفقك يارب

pakinam ismail said...

اهلا بيكى يا سارة مرسى بجد جداااااااا

لكلامك الجميل ليا سعيده جدا بيه

اتمنى وجودك بمعرض الكتاب يوم الجمعه الكتاب هينزل ان شاء الله

واتمنى تعجبك اليوميات الجديده كمان ويعمل انقلاب فعلا :)

pakinam ismail said...

مرسى جدا ليكى يا بسمه نورتى المدونة

واتمنى يعجبك الكتاب وتشرفينى بالمعرض ان

شاء الله

Anonymous said...

انا مروة بجد اليوميات بتاعتك دى زى العسل ودمك خفيف قوى واكنك بتتكلمى عن البنات واللى بيحصل معاها ربنا يوفقك وتفضلى تسعدينا بيومياتك دى وربنا يرزقك باابن الحلال وتبعدى عن العاهات دى وغسيل المواعين الكتير دى هههههههههه

Unknown said...

بجد تحفة يا كوكي انتي بجد دمك خفيف و طريقة القائك روعة

Anonymous said...

بس اجدع حاجة فيكى انك رديتى عليه ومسبتهوش يعنى ..ربنا يوفقك يا قمر

pakinam ismail said...

تحياتى للجميع وشكرا جدا على رأيكم وأتمنى اليوميات الجديده اللى نزلتها تعجبكم :)

 

يــومــيــات بـــنــوتـــة Template by Ipietoon Blogger Template | Gadget Review